სახატავად უამრავი ტექნიკა და საშუალება არსებობს: ვიღაცები ფანქრებს იყენებენ, ზოგი ზეთის საღებავებს ამჯობინებს და ზოგიც კიდევ — ფრინველებს.

ეს უკანასკნელი უცნაურად მოგხვდათ თვალში? დაგვერწმუნეთ, მარტო არ ხართ, თუმცა ნამდვილად სწორად წაიკითხეთ — ფრინველების გამოყენება ნახატის შესაქმნელად. ამ უცნაური მეთოდის რეალურობაში კი ეს სტატია დაგარწმუნებთ.

ქუჩაში მტრედებისთვის ნამცეცები ბევრ ვინმეს დაუყრია, ასევე ბევრ ვიღაცას შეუქმნია შთამბეჭდავი გამოსახულებები ქუჩის სივრცეებში, თუმცა ეს ორი ერთი შეხედვით სრულიად განსხვავებული რამ მხოლოდ ერთმა კრეატიულმა ხელოვანმა დაუკავშირა ერთმანეთს: მან მტრედები გამოკვება და ამ გზით უჩვეულო გამოსახულებაც შექმნა.

თუ დაჯერება კვლავ გიჭირთ, ეჭვებს ეს გიფი საბოლოოდ გაგიფანტავთ:

ეს გიფი სხვადასხვა სოციალურ ქსელში რამდენიმე დღის წინ გავრცელდა და სულ მალე ათასობით მომხმარებლის დადებით გამოხმაურებასთან ერთად ოთხ მილიონზე მეტი ნახვა დააგროვა.

გარდა იმისა, რომ იდეის ავტორმა მტრედების გამოკვებით მისთვის სასურველი "ცოცხალი გამოსახულება" შექმნა, მნახველების ნაწილმა კიდევ ერთი უცნაური დეტალი შენიშნა: მტრედებისა და სხვა ფრინველების გვერდით ინდაურიც გამოჩნდა.

მიუხედავად უცაბედი წარმატებისა, უცნობია, თუ ვინ არის ამ იდეის ავტორი და განმახორციელებელი: არ გარკვეულა, ვინ ატვირთა ის ინტერნეტში. თუმცა, ასეთი გამოხმაურების შემდეგ ეს უჩვეულო ფანტაზიის მქონე შემოქმედი თუ კვლავ ანონიმურად დარჩენას ამჯობინებს, ალბათ, კიდევ უფრო საინტერესო გამოსახულებების "გაცოცხლებას" მაინც გააგრძელებს.