ხუთშაბათს, სირიის ხელისუფლება და აჯანყებულები მთელი ქვეყნის მასშტაბით ცეცხლის შეწყვეტაზე შეთანხმდნენ. ინფორმაციას BBC ავრცელებს.

ცეცხლის შეწყვეტაზე რუსეთის პრეზიდენტის, ვლადიმერ პუტინის განცხადება თურქეთმა დაადასტურა. გადაწყვეტილების გარანტორები ეს ორი სახელმწიფო იქნებიან, რომლებიც კონფლიქტის მოწინააღმდეგე მხარეებს უჭერენ მხარს.

შეთანხმება დაადასტურა გაეროს მოლაპარაკებების უმაღლესმა კომიტეტმაც.

შეთანხმებაში მონაწილებს ერთი მხრივ, სირიის სამთავრობო ძალები, მისი მოკავშირეები და რუსული სამხედროები. მეორე მხრივ, სირიის თავისუფალი არმიის ლიდერმა განაცხადა, რომ შეთანხმებას ხელი მოაწერა 13-მა შეიარაღებულმა ოპოზიციურმა დაჯგუფებამ.

გარიგებაში არ მონაწილეობენ ჯიჰადისტები. ე.წ. ისლამური სახელმწიფო და მასთან დაკავშირებული დაჯგუფებები. ცნობილია, რომ შეთანხმებაში არ მონაწილეობს ქურთული დაჯგუფებაც. ქურთული ჯგუფები ჩრდილოეთ სირიის დიდ ნაწილს აკონტროლებენ. მათ შორის ტერიტორიებს თურქეთის საზღვართან.