ამერიკის პრეზიდენტმა, დონალდ ტრამპმა ფედერალური საშემოსავლო გადასახადის სახით, როგორც 2016, ასევე 2017 წელს მხოლოდ 750 დოლარი გადაიხადა. ამის შესახებ ჟურნალისტური გამოძიება The New York Times-მა ჩაატარა.

გამოცემის ცნობით, ტრამპი ბოლო 10 წლის განმავლობაში გადასახადებს საერთოდ არ იხდიდა, ძირითადად იმიტომ, რომ ის უფრო მეტ ფულს კარგავდა, ვიდრე იგებდა. მედიამ მისი საგადასახადო დეკლარაციის 20 წლის მონაცემები მოიპოვა, მათ შორის, ასობით იმ კომპანიისა, რომელიც პრეზიდენტის ბიზნესს ორგანიზაციას წლების მანძილზე აყალიბებდა. სტატიაში ვკითხულობთ, რომ ტრამპი აგრესიულად ცდილობდა გადასახადებისგან თავის არიდებას, მიუხედავად იმისა, რომ მას სხვადასხვა ბიზნესიდან ასობით მილიონი შემოსავალი უფიქსირდება.

NYT-ის საპასუხოდ, ტრამპის ორგანიზაციის იურისტმა ალან გარტენმა, განაცხადა, რომ "ამ ფაქტების უმეტესობა, თუ ყველა არა, არაზუსტია". მან გამოცემას იმ დოკუმენტების წარდგენა მოსთხოვა, რომელზე დაყრდნობითაც ეს ინფორმაცია გაავრცელა, თუმცა მედიამ წყაროს დაცვის მიზნით, ჩანაწერების მიწოდებაზე უარი განაცხადა.

"ბოლო წლების განმავლობაში, ტრამპა მილიონობით დოლარი გადაუხადა ფედერალურ მთავრობას, მათ შორის მილიონობით პირადი გადასახადი მისი კანდიდატურის გამოცხადების, ანუ 2015 წლის შემდეგ", — განაცხადა გარტენმა.

ამას გამოეხმაურა დონალდ ტრამპიც. მისი თქმით, მედიის მიერ წარმოდგენილი ინფორმაცია "ფეიკ ნიუსია", რადგან იგი გადასახადებს იხდიდა. მიუხედავად ამისა, მან დეტალურად საუბარს თავი აარიდა. ტარმპმა განაცხადა, რომ გამომდინარე იქიდან, დეკლარაციებს საგადასახადო უწყება შეისწავლის, იგი საჯარო მას შემდეგ გახდება, რაც აუდიტი დასრულდება.