შინაგან საქმეთა სამინისტროს წარმომადგენელმა თბილისის საქალაქო სასამართლოში მიმდინარე პროცესზე მოსამართლისგან მოითხოვა, რომ ადმინისტრაციული პატიმრობა შეუფარდონ თეთრი ხმაურის მოძრაობის აქტივისტებს, შოთა ხინჩაგაშვილსა და მირიან მალაყმაძეს.

სამართალდამცავები აქტივისტებს ადმინისტრაციულ სამართალდარღვევათა კოდექსის 173-ე მუხლის დარღვევას ედავებიან, რაც პოლიციელისადმი ბოროტ დაუმორჩილებლობას გულისხმობს. მოგვიანებით, 27 დეკემბერს, მათ კი კიდევ ერთი მუხლი, შეკრებისა და მანიფესტაციის წესის დარღვევა დაემატა, თუმცა, დღეს მხოლოდ 173-ე მუხლთან დაკავშირებული დარღვევის განხილვა მიმდინარეობს, რაც შეეხება მანიფესტაციის წესის დარღვევას, ეს პროცესი 3 იანვრისთვისაა ჩანიშნული. საქმეს მოსამართლე მერი გულუაშვილი განიხილავს.

პოლიციელები ამბობენ, რომ 10 დეკემბრის აქცია ნარკოტიკების მოხმარების დეკრიმინალიზაციის მოთხოვნით, მერიის შესაბამისი სამსახურების მხრიდან სანქცირებული არ იყო და აქტივისტები მათ მოთხოვნას "ბოროტად არ დაემორჩილნენ" და გზა მაინც გადაკეტეს. ადვოკატებმა სასამართლოზე მათ პასუხად თქვეს, რომ აქციაზე ბევრი ხალხი იყო, რამაც ბუნებრივად გამოიწვია მოძრაობის შეფერხება და ეს არ ყოფილა დაუმორჩილებლობა.

ადვოკატისვე თქმით, აქციაზე იმდენად ბევრი ხალხი იყო, რომ შოთა ხინჩაგაშვილს რომც სდომებოდა უკან დახევა, ვერ დაიხევდა, რადგან ამაში ხელს ხალხის მასა უშლიდა.

მოსამართლის კითხვაზე, თუ რატომ დააკავეს მაინცდამაინც ხინჩაგაშვილი და მალაყმაძე, შსს-ს წარმომადგენელმა უპასუხა, რომ ისინი ყველაზე მეტად აქტიურობდნენ.

რამდენიმე წუთის წინ მოსამართლემ დარბაზიდან გააძევა თეთრი ხმაურის მოძრაობის აქტივისტი ბექა წიქარიშვილი, რომელიც მსჯელობაში ჩაერია.

On.ge-ს ჟურნალისტი ამ წუთები ესწრება სასამართლო პროცესს და სიახლეებს პერიოდულად შემოგთავაზებთ.

თეთრი ხმაურის მოძრაობის აქტივისტების უფლებებს სასამართლოში ადამიანის უფლებების სწავლებისა და მონიტორინგის ცენტრი (EMC) იცავს.