საზოგადოებრივი მაუწყებლის დირექტორობის კანდიდატი ხათუნა ლაგაზიძე არხის განვითარების კონცეფციის მთავარ ნაწილად ყალბ ინფორმაციასთან ბრძოლას ასახელებს. მას აქვს იდეა მაუწყებელს ჰქონდეს ინტერაქციული გადაცემა, როგორც ტელევიზიის, ასევე, რადიოს ეთერში, რომელიც დეზინფორმაციის წინააღმდეგ იქნება მიმართული.

"დღეს, ახალი გამოწვევების პირობებში, რომლის წინაშეც არამხოლოდ საქართველო დგას, სახელმწიფოსა და საზოგადოების საინფრომაციო უსაფრთხოება არის ქვეყნის თავდაცვის ერთ-ერთ მთავარი ზღუდე და პრიორიტეტი. მე გავიცანი ყველაზე წარმატებული საზოგადოებრივი მაუწყებლების პრაქტიკას, არის ეს ბრიტანული, გერმანული, თუ კანადური, ყველგან არის ერთი ძირეული მიმართულება აღებული — ყალბი ინფორმაციისგან, დეზინფორმაციისგან დაცვა საკუთარი საზოგადოების.

მე ვფიქრობ, რომ პრინციპული მნიშვნელობის საკითხია, საზოგადოებრივი მაუწყებელი, რომელიც ფინანსდება საქართველოს საზოგადოების შემოსავლებისგან, იყოს მთავარი თავდაცვის იარაღი იმ საინფრომაციაო ომში, რომელშიც საქართველო უკვე რამდენიმე წელია სერიოზული დარტყმის ობიექტი გახლავთ", — განაცხადა მან სამეურვეო საბჭოს წევრებთან გასაუბრებისას.

მანვე აღნიშნა, რომ ყალბ ინფორმაციასთან საბრძოლველად მაღალი რეიტინგია საჭირო, რადგან ვერ ისაუბრებენ საზოგადოებრივ მაუწყებელზე, როგორც საზოგადოების თავდაცვის იარაღზე და ნდობა ვერ იქნება, თუ ტელევიზიას მოსახლეობის მხოლოდ 5% უყურებს.

გაიგეთ მეტი სხვა კანდიდატების გასაუბრებაზე:

საზოგადოებრივი მაუწყებლის დირექტორის ხელფასი 4 ათასი ლარიდან 10 ათას ლარამდე გაიზრდება. გადაწყვეტილება თანამდებობრივი სარგოს გაზრდაზე სამეურვეო საბჭომ ერთხმად დაამტკიცა.

ამჟამად საზოგადოებრივ მაუწყებელში გენერალური დირექტორის პოზიციაზე შესარჩევი კონკურსი მიმდინარეობს. კონკურსის მეორე ტურში გადავიდნენ თინათინ ბერძენიშვილი, ირმა სოხაძე, ხათუნა ლაგაზიძე და ალექსანდრე ვახტანგოვი. თუმცა, ვახტანგოვმა კანდიდატურა მოხსნა.

საზოგადოებრივი მაუწყებლის გენერალური დირექტორის თანამდებობა ვაკანტური მას შემდეგ გახდა, რაც ვასილ მაღლაფერიძემ თანამდებობა დატოვა. მაღლაფერიძის მტკიცებით, გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

გენერალურ დირექტორს თანამდებობაზე ნიშნავს სამეურვეო საბჭო ღია კონკურსის წესით, 6 წლის ვადით.