ბულგარეთის პროკურატურამ ორი რუსი დიპლომატი ჯაშუშობაში დაადანაშაულა და მათ ქვეყნიდან აძევებს. ქვეყნის დასატოვებლად მათ 72 საათი მისცეს. ამის შესახებ ინფორმაციას რადიო თავისუფლების რუსული ბიურო ავრცელებს.

საქმე კონტრდაზვერვის ეროვნული უსაფრთხოების სამსახურის თხოვნით სპეციალური პროკურატურის ოფისმა გახსნა. საგამოძიებო მასალების თანახმად, 2016 წლიდან რუსები აგროვებდნენ ინფორმაციას ბულგარეთის არმიის მოდერნიზაციის გეგმისა და აღჭურვილობის საბრძოლო მზადყოფნის მდგომარეობის შესახებ. პროკურატურის მტკიცებით, ისინი დაუკავშირდნენ ბულგარეთის მოქალაქეებს, რომლებსაც აქვთ წვდომა სამხედრო-სამრეწველო კომპლექსზე, ზოგიერთ შემთხვევაში მათ დაჰპირდნენ ფულს სამუშაოსთვის.

ჯაშუშობაში ეჭვის გამო ბულგარეთმა იანვარში უკვე გააძევა ორი რუსი დიპლომატი. ერთი მათგანი იყო რუსეთის საელჩოს საკონსულო დეპარტამენტის პირველი მდივანი, ხოლო მეორე მუშაობდა რუსეთის სავაჭრო მისიის თანამშრომლად. შემდეგ მოსკოვმა მათ გაძევებას არამეგობრული ნაბიჯი უწოდა. 2019 წლის ოქტომბერში სოფიამ იმავე ბრალდებით გააძევა კიდევ ერთი რუსი დიპლომატი. ტრადიციულად, მოსკოვი ბრალდებებს უარყოფს.