ევროპული საქართველოს ლიდერი, დავით ბაქრაძე, ენმ-ის მიერ ერთიანი სიის შემოთავაზებაზე საუბრობს.

დავით ბაქრაძის თქმით, მითიური სიებისა და თანამდებობების შემოთავაზება ხელს უწყობს იმ პოლარიზაციას, რომელიც დღეს ისედაც დიდი პრობლემაა. ბაქრაძის თქმით, ქვეყანაში უნდა იყოს მრავალფეროვანი არჩევანი, მრავალპარტიული მართვა, ხოლო ეს შემოთავაზება ამის საწინააღმდეგო იყო.

დავით ბაქრაძის თმით, მთავარი პრობლემა არის ის, თუ რატომ არ დათანხმდა ენმ საერთო კანდიდატებს და რატომ აირჩია ვიწრო პარტიული გზა. მისივე თქმით, მიუხედავად ამისა, მას სჯერა, რომ ოპოზიცია ერთიანად ამ არჩევნებში გაიმარჯვებს და საქართველოს ეყოლება მრავალპარტიული, კოალიციური მთავრობა.

"ერთიან სიაზე იყო საჯარო შემოთავაზება, რასაც მაშინვე უარყოფითი შეფასება მოყვა ჩვენი მხრიდან, ვინაიდან ერთიანი სია ნიშნავს ხელშეწყობას იმ პოლარიზაციის, რომელიც დღეს ისედაც პრობლემაა საქართველოში და ნიშნავს დაფრთხობას ყველა იმ ამომრჩევლის, ვისაც არ უნდა არც ივანიშვილი და არც სააკაშვილი და ვინც ეძებს ქვეყანაში მრავალფეროვან არჩევანს. ამიტომ, ჩვენი პოზიციაა, რომ ქვეყანაში უნდა იყოს მრავალფეროვანი არჩევანი, რომ ქვეყანას აღარ სჭირდება ერთპარტიული მართვა და უნდა იყოს მრავალპარტიული მთავრობა, ამ ყველაფერს ეწინააღმდეგება ერთიანი სია და ჩვენი პოზიცია ამ შეთავაზებაზე იყო მკაფიოდ უარყოფითი.

რაც შეეხება თანამდებობების შემოთავაზებას, ეს არის პირდაპირ ტყუილი, არანაირი საუბარი თანამდებობების შემოთავაზებაზე არ ყოფილა და არც მივიღებდით, რადგან ჩვენთვის მთავარი ამოცანაა არა თანამდებობების და სკამების განაწილება, არამედ გარდამტეხი ცვლილებები მოტანა 4 მილიონი ქართველისათვის, რომელიც დღეს არის კრიზისულ და უმძიმეს მდგომარეობაში", — განაცხადა ბაქრაძემ.

მისი თქმით, პარტიაშიც არ ასახელებენ პრემიერობის კანდიდატს, რადგან მათი პოლიტიკა მორგებულია არა პიროვნებებზე, არამედ მთლიანად ხალხზე. მისივე თქმით, ამიტომ, გამორიცხულია და ვერ ექნებოდათ ასეთი ტიპის რაიმე მოლაპარაკება ნაციონალურ მოძრაობასთან.

"მთლიანობაში, მთელი ეს საკითხი და ამ თემის წამოჭრა ემსახურება იმ ამოცანას, რომ გადაიფაროს მთავარი პრობლემა, რატომ არ დათანხმდა ენმ ერთიან მაჟორიტარების კანდიდატებს, იმიტომ, რომ ერთიანი კანდიდატები რეგიონებში იქნებოდა გარანტირებული გზა პირველივე ტურში დაგვემარცხებინა ქართული ოცნება. სამწუხაროდ, ნაციონალურმა მოძრაობამ აირჩია ვიწრო პარტიული გზა, ერთპარტიული გამარჯვების სტრატეგია, უარი თქვა ამ შეთანმებაზე და მეტიც, თბილისში მიღწეული შეთანხმება ჩაშალა ისანში. ამიტომ, მთავარი პრობლემა დღეს გახლავთ სწორედ ის, რატომ არ ჰყავს ოპოზიციას ერთიანი კანდიდატები და არა რაღაც მითიური მოლაპარაკებები სიებსა და სკამებზე.

მიუხედავად ამ ყველაფრისა, დარწმუნებული ვარ, რომ ოპოზიცია, ერთიანად ამ არჩევნებში აუცილებლად გაიმარჯვებს, ჩვენ მზად ვართ შევასრულოთ ყველა ის ვალდებულება, რომელიც უკაშირდება თბილისში, ნაციონალური მოძრაობის კანდიდატების მხარდაჭერას და ჩვენ მზად ვართ ვიყოთ ღერძი მომავალი კოალიციური მრავალპარტიული მთავრობის, სადაც წარმოდგებილი იქნება ყველა ოპოზიცური პარტია", — განაცხადა დავით ბაქრაძემ.