ევროპული საქართველო არჩევნებისთვის უწყებათაშორისი კომისიის სხდომას აღარ დაესწრება. ამის შესახებ პარტიის ერთ-ერთმა ლიდერმა, სერგი კაპანაძემ განაცხადა.

"ეს არის კომისია, რომელსაც ხელმძღვანელობს ქართული ოცნების გამორჩეული ღვარძლიანი და ბოღმიანი სახე ქალბატონი თეა წულუკიანი, რომელიც ამ კომისიასაც როგორც სხვა დანარჩენს, იყენებს თავისი პოლიტიკური მიზნებისთვის. შეუძლია შეიკრიბოს თავის თანამზრახველებთან ერთად და რაზეც უნდა იმაზე იმსჯელოს", — განაცხადა სერგი კაპანაძემ.

უწყებათაშორისი კომისიის სხდომა დღეს, 22 სექტემბერს იუსტიციის სამინისტროში გაიმართება. კაპანაძის თქმით, ყველა დარღვევაზე მათ საკუთარი რეაგირება ექნებათ.

თავისუფალი და სამართლიანი არჩევნებისათვის უწყებათაშორისი კომისიის მიზანი წინასაარჩევნო აგიტაციისა და კამპანიისას ადმინისტრაციული რესურსის გამოყენების აკრძალვა, არჩევნების დროს საჯარო მოსამსახურეების მხრიდან საარჩევნო კანონმდებლობის დარღვევის პრევენცია, გამოვლენილ დარღვევებზე რეაგირება და ამ გზით თავისუფალი და სამართლიანი საარჩევნო გარემოს შექმნაა.