ბათუმში საოჯახო მედიცინის ცენტრის 4 თანამშრომელს კორონავირუსი დაუდასტურდა. ცენტრის გენერალური დირექტორის, ბექა იოსელიანის განცხადებით, ინფიცირებულებს შორის არის ის პირი, ვინც მოქალაქეებს ცხვირ-ხახის ნაცხის ანალიზს უღებდა და კლინიკის დირექტორი. თუმცა მისი თქმით, ინფიცირების შემდეგ არცერთს მათგან არ ჰქონია შეხება პაციენტებთან.

On.ge-სთან საუბარში ის განმარტავს, რომ კლინიკის ყველა თანამშრომელს 24 საათში ერთელ უტარდებათ PCR ტესტი და მოვალეობის შესრულებას იქამდე არ იწყებენ, სანამ ტესტის პასუხი ცნობილი არ არის. მისი თქმით, ნაცხის ამღები პირს ბოლო მორიგეობის წინ ტესტირება ჩაუტარდა, რომელიც უარყოფითი იყო, ხოლო ახალ მორიგეობაზე გასვლის წინ ხელახალი ტესტი აიღო და პაციენტებთან შეხება არ ჰქონია, სანამ პასუხი არ მიიღო, რომელიც დადებითი აღმოჩნდა.

იოსელიანის თქმით, ამ პირის ინფიცირების მიზეზი დაინფიცირებული პაციენტი გახდა. ცენტრის დირექტორის ინფიცირების წყარო კი ნათესავია. რაც შეეხება კლინიკის მენეჯერს, რომელიც ასევე ინფიცირებულია, ისიც დროულად იქნა, რადგან სკრინინგში იყო ჩართული.

"ყველა კონტაქტი მოძიებულია, მაგრამ როგორც მოგახსენეთ, ვირუსი გადამდები, ანუ ვირულენტური არის მაშინ, როდესაც დასნებოვნებიდან რაღაც პერიოდი არის გასული, განსაკუთრებით კი მაშინ, როცა პაციენტი არის სიმპტომური", — განუცხადა იოსელიანმა ჟურნალისტებს.

21 სექტემბრის მონაცემებით, საქართველოში კორონავირუსის 193 ახალი შემთხვევა გამოვლინდა, გამოჯანმრთელდა — 40, ხოლო გარდაიცავალა 1 პაციენტი.

ქვეყანაში სულ კორონავირუსის 3 695 შემთხვევაა გამოვლენილი, საიდანაც 1 534 უკვე გამოჯანმრთელდა, 20 კი გარდაიცვალა.

კარანტინში არის 4 988 პირი, ხოლო სტაციონარში მეთვალყურეობის ქვეშ — 836.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: