საქართველოს პარლამენტის წევრი ნატო ჩხეიძე, რომელიც პარლამენტში საქართველოს პატრიოტთა ალიანსის სიით მოხვდა კვლავ არღვევს „მაუწყებლობის შესახებ“ კანონს. ის 26 დეკემბრის მონაცემებით, კვლავ ფლობს იბერია TV-ს 30 პროცენტიან წილს.

"მაუწყებლობის შესახებ" კანონის მიხედვით, თანამდებობის პირი, მათ შორის პარლამენტის წევრი, მაუწყებლობის სფეროში არ შეიძლება ფლობდეს ლიცენზიას ან იყოს ავტორიზებული პირი.

როგორც საქართველოს კომუნიკაციების ეროვნული კომისიიდან 26 დეკემბერს მოწოდებული საჯარო ინფორმაციით გახდა ცნობილი, ტელეკომპანიის მფლობელების განახლებული ინფორმაცია კომისაიმ 21 ნოემბერს მოითხოვა. ინფორმაციის განსასახლებლად ტელეკომპანიას 5 სამუშაო დღის ვადა ჰქონდა.

იმის მიუხედავად, რომ 5 სამუშაო დღე გავიდა ტელეკომპანიის მესაკუთრეები არ შეცვლილან. ტელეკომპანია იბერიას დირექტორმა მარიამ ჯაფარიძემ 25 ნოემბერს კომისიას აცნობა, რომ ნატო ჩხეიძისა და მისი პარტნიორის ზაზა ოქუაშვილის წილები მართვის უფლებით გადაეცათ სხვა პირებს - ლელა აბულაძეს, გია დევდარიანსა და კონსტანტინე ვაშაყმაძეს. ჯაფარიძემ წერილს შესაბამისი დოკუმენტების ასლებიც დაურთო. თუმცა, კომისიამ მართვის უფლების გადაცემა სხვა პირებისთვის საკმარისად არ მიიჩნია და წილების ცვლილებების მისაწოდებლად 19 დეკემბერს ტელელეკომპანიას დამატებით კიდევ 5 სამუშაო დღე მისცა. ცვლილებების შესახებ ტელევიზიის წარმომადგენლებს, კომისიის მიერ საჯარო ინფორმაციის მოწოდების მომენტამდე, არ უცნობებიათ.

იმ შემთხვევაში, თუ ტელევიზიის წილი კვლავ თანამდებობის პირი დარჩება საქართველოს კომუნიკაციების ეროვნული კომისია ადმინისტრაციულ წარმოებას დაიწყებს, რის შემდეგაც შესაძლოა იბერია TV-ს ავტორიზაცია შეუჩერდეს. ავტორიზაციის შეჩერება მაუწყებლობის უფლების შეჩერებას ნიშნავს.