ევროპასთან ინტეგრაციისა და საგარეო ურთიერთობათა კომიტეტების გაერთიანებულ სხდომაზე, საქართველოს საგარეო საქმეთა მინისტრმა, მიხეილ ჯანელიძემ იმ მიზეზებზე ისაუბრა, რის გამოც ამ დრომდე არ კონტროლდება საქართველო-რუსეთის დამაკავშირებელი იმ საბაჟოების კონტროლი, რომლებიც ოკუპირებული აფხაზეთისა და სამხრეთ ოსეთის ტერიტორიაზე მდებარეობს.

როგორც მიხეილ ჯანელიძემ განაცხადა, საერთაშორისო ტენდერის შედეგად გამოვლენილია შვეიცარიული კომპანია SGS, რომელმაც უნდა გააკონტროლოს აღნიშნულ საბაჟოებზე ტვირთბრუნვა. SGS-თან კი საქართველომ და რუსეთმა უნდა გააფორმონ იდენტური ხელშეკრულებები. აღნიშნულ მხარეებს ავალებს 2011 წლის ნოემბერში მიღწეული შეთანხმება. ამ შეთანხმების მიხედვით, საქართველო დათანხმდა ვაჭრობის მსოფლიო ორგანიზაციაში რუსეთის გაწევრიანებას. აღნიშნული ორგანიზაცია წევრებს ავალდებულებს, რომ მათ შორის საზღვრები და ტვირთბრუნვა უნდა იყოს გამჭვირვალე. იმის გამო, რომ საქართველო-რუსეთს შორის არსებული ორი საბაჟო ოკუპირებულ ტერიტორიაზეა, მიღწეული შეთანხმების მიხედვით, სწორედ ტენდერში გამარჯვებული საერთაშორისო კომპანია გააკონტროლებს ამ საბაჟოებზე ტვირთბრუნვას. ეს შესაძლებლობას მისცემს საქართველოს ჰქონდეს ინფორმაცია აფხაზეთიდან და სამხრეთ ოსეთიდან რუსეთში გასული ტვირთების შესახებ.

მიუხედავად იმისა, რომ შეთანხმებას ქვეყნებმა რამდენიმე წლის წინ მიაღწიეს, საერთაშორისო მონიტორები ამ ტერიტორიებზე ჯერ არ გამოჩენილან.

ჯანელიძის თქმით, პროცესი გააჭიანურა გარკვეულ დეტალებზე შეუთანხმებლობამ, ასევე, შვეიცარიელი მომლაპარაკებლის გარდაცვალებამ: "მის შემცვლელს ველოდებით იანვარში. ამ კონტრაქტის თითქმის ყველა მუხლი შევათანხმეთ, არის მცირე საკითხები, რომელიც საჭიროებს დაზუსტებას რუსეთის ფედერაციის მხრიდან. ჩვენ ამ შეთანხმებას ვცდილობთ შვეიცარული მხარის მეშვეობით".