ბიძინა ივანიშვილი დიდი ბრიტანეთის სასამართლოს მოუწოდა, ძალაში დატოვოს გადაწყვეტილება, რომელიც Credit Suisse-ის $607 მლნ-ის გადახდას აკისრებს. ამის შესახებ ინფორმაციას Reuters ავრცელებს.

ქართული ოცნების დამფუძნებელი ბერმუდაში შვეიცარიული ბანკის სიცოცხლის დაზღვევის ადგილობრივ განყოფილებას უჩიოდა, რათა აენაზღაურებინა ზარალი, რომელიც პატრის ლესკადრონმა კლიენტებს მიაყენა.

ლესკადრონი, რომელიც Credit Suisse Trust-ის მრჩეველი იყო სინგაპურში, 2018 წელს შვეიცარიის სასამართლომ დამნაშავედ ცნო კლიენტების, მათ შორის ივანიშვილის, ხელმოწერების გაყალბებასა და ტრანზაქციების ფალსიფიკაციაში. მან 2020 წელს თავი მოიკლა.

ივანიშვილმა და მისმა ოჯახმა ბერმუდაში დაფუძნებულ Credit Suisse Life-ს უჩივლეს. სასამართლომ Credit Suisse-ს 607 მილიონი დოლარის ანაზღაურების განაჩენი გამოუტანა, რაც სააპელაციო სასამართლომ 2023 წელს დაადასტურა.

Credit Suisse — რომელიც ამჟამად კონკურენტი UBS-ის საკუთრებაა — ბერმუდის სასამართლოს გადაწყვეტილებას ლონდონში ასაჩივრებს — Privy Council-ში, რომელიც ბერმუდასა და სხვა თანამეგობრობის ქვეყნებისთვის საბოლოო სააპელაციო ინსტანციაა.

CS Life-ის წარმომადგენელმა, ადვოკატმა ჩარლზ ფალკონერმა, სასამართლოს განუცხადა, რომ ბერმუდის სასამართლოებმა არასწორად გაიგეს ივანიშვილთან დადებული კონტრაქტი და ამიტომ კომპანიის პასუხისმგებლობა არასწორად განსაზღვრეს იმ ქმედებებისთვის, რაც სინამდვილეში Credit Suisse AG-ს ეკუთვნოდა.

Credit Suisse მიუთითებს იმასაც, რომ ივანიშვილი აშშ-ის მიერ დეკემბერში იყო დასანქცირებული, როგორც რუსეთთან დაკავშირებული და საქართველოში დემოკრატიის შეზღუდვაში თანამონაწილე — რაც ეჭვქვეშ აყენებს, მისთვის კომპენსაციის გადაცემას.

Reuters წერს, რომ ივანიშვილს ცალკე სასამართლო დავა ჰქონდა Credit Suisse-ის წინააღმდეგ სინგაპურშიც, სადაც მან თავდაპირველად 926 მილიონი დოლარის მიღება მიაკუთვნეს, თუმცა გასულ წელს სააპელაციო წესით ეს თანხა 461 მილიონამდე შემცირდა.