ერთი შეხედვით უცნაურმა თეორიამ, რომელიც ცივი ომის პერიოდიდან იღებს სათავეს, ინტერნეტში პოპულარობა ხელახლა შეიძინა — ამ თემაზე მიმები და პოსტები ვირუსულად ვრცელდება სოციალურ ქსელებში. რა არის პენტაგონის პიცის თეორია?

გიფიქრიათ იმაზე, რომ პიცის გამოძახება პენტაგონში შესაძლოა გეოპოლიტიკურ კატასტროფაზე იუწყებოდეს?

სწორედ ესაა პენტაგონის პიცის თეორია — ან პენტაგონის პიცის საზომის — არსი.

თუ პენტაგონსა და თავდაცვის დეპარტამენტში მომუშავე გუნდები განსაკუთრებით დატვირთულები არიან, ისინი ვერ ტოვებენ თავიანთ სამუშაო ადგილებს. ეს კი ნიშნავს, რომ მსოფლიოში რაღაც სერიოზული ხდება. მიუხედავად ამისა, გუნდებს მაინც სჭირდებათ საკვები, ასე რომ, ისინი სადილს სამსახურში იხებენ, ისევე, როგორც ყველა ჩვენგანს გაუკეთებია. რა შეიძლება ოფისში იმაზე სწრაფად მოგიტანონ, ვიდრე პიცა?

შესაბამისად, ჩამოყალიბდა თეორია, რომლის მიხედვითაც, თუ ვაშინგტონში პიცის
გამოძახების რაოდენობა იზრდება, ეს შესაძლოა, მოახლოებულ კრიზისზე მიუთითებდეს.

ეს ყველაფერი ცივი ომის პერიოდს უკავშირდება. მაშინ საბჭოთა დაზვერვის სამსახურები ზედმეტად მომატებულ პიცის მიტანის რაოდენობას აკვირდებოდნენ და ცდილობდნენ, ამ გზით გაეგოთ, ხომ არ იყო დასავლეთში მაღალი საგანგებო მზადყოფნა ან კრიზისული სიტუაცია.

შემდეგ, 1990 წლის 1 აგვისტოს, ფრენკ მიკსმა, "დომინოს პიცის" მფლობელმა, შენიშნა, რომ პიცის შეკვეთების რაოდენობამ მოულოდნელად, საგრძნობლად მოიმატა CIA-ს შენობებში... ეს ხდებოდა ქუვეითში ერაყის შეჭრის წინ — მოვლენის, რომელმაც სპარსეთის ყურის ომს დაუდო სათავე.

იმ დროს მან ეს დამთხვევად ჩათვალა, მაგრამ მოგვიანებით ამ მოვლენებმა გარკვეული კანონზომიერების სახე მიიღო.

მიკსმა გამოცემა Los Angeles Times-ს უთხრა, რომ პიცის გამოძახების რაოდენობის მკვეთრი ზრდა შეინიშნებოდა 1998 წლის დეკემბერშიც — ყოფილი პრეზიდენტის, ბილ კლინტონის იმპიჩმენტის მოსმენების პერიოდში.

სოციალური მედიის ეპოქაში, ამ თეორიამ ონლაინ-დეტექტივებს უბიძგა, პენტაგონის გარშემო პიცის შეკვეთების რაოდენობა გაეანალიზებინათ.

გაინტერესებთ, რას მიაკვლიეს ინტერნეტის მომხმარებლებმა? 2024 წლის 13 აპრილს, პიცის შეკვეთების რაოდენობა პენტაგონში, თეთრ სახლში და თავდაცვის დეპარტამენტშიც არაჩვეულებრივად მაღალი იყო. ამ თარიღს დაემთხვა ირანის მიერ ისრაელის ტერიტორიაზე დრონების გაშვება.

პლატფორმა X-ზე (ყოფილი Twitter), ანგარიში სახელად @PenPizzaReport ამაღელვებელ ამოცანას იღებს თავის თავზე — რეალურ დროში აკვირდება პიცერიების აქტივობას პენტაგონის მახლობლად.

2025 წლის 1 ივნისს, ანგარიშმა მნიშვნელოვანი პოსტი გამოაქვეყნა:

"დახურვამდე ერთი საათით ადრე, პენტაგონის უახლოესი "დომინოს პიზა" არანორმალური რაოდენობის შეკვეთებს იღებს." ალბათ, უკვე ხვდებით, რა მოჰყვა ამ დაკვირვებას — რამდენიმე საათში ისრაელმა ირანს შეუტია.

შესაძლოა თუ არა, რომ პიცა ომს წინასწარმეტყველებდეს ან აშშ-ის გლობალურ კრიზისებში ჩართულობას განსაზღვრავდეს? ალბათ, ეს არ არის ყველაზე სანდო გეოპოლიტიკური მაჩვენებელი და პიცის შეკვეთის სამხედრო დაძაბულობასთან დადასტურებული კავშირი არ ჰქონდეს, თუმცა, ფაქტია, რომ საქმე საკმაოდ მადისაღმძვრელ თეორიასთან გვაქვს.

როგორც CNN-ის იმდროინდელმა პენტაგონის კორესპონდენტმა, ვოლფ ბლიცერმა, 1990 წელს თქვა, "ჟურნალისტებს გირჩევთ, რომ ყოველთვის დააკვირდეთ პიცებს." შეიძლება ეს ხუმრობაა, მაგრამ, იქნებ პენტაგონმა სხვა საჭმელიც უნდა დააგემოვნოს...