მორაგბის დაჭრის საქმეზე დაკავებულ რაგბის კავშირის ვიცე-პრეზიდენტ მერაბ ბესელიას ბრალს ოფიციალურად დღეს წარუდგენენ. ის ამჟამად დროებითი მოთავსების იზოლატორში იმყოფება. როგორც ბრალდებულის ადვოკატი, პაატა მეხრიშვილი რუსთავი 2-თან ინტერვიუში ამბობს, ამის შემდეგ სასამართლო დაინიშნება, რომელიც აღკვეთზე იმსჯელებს. მეხრიშვილის თქმით, თავად დაკავებული, მერაბ ბესელია მომხდარს ნანობს და გამოძიებასთან სრულყოფილ თანამშრომლობას აპირებს.

"ის ძალიან განიცდის ამ ინციდენტს. ამბობს, რომ მას არავის დაზიანების სურვილი არ ჰქონია. იყო კონფლიქტური სიტუაცია და ამ კონფლიქტს მოჰყვა გასროლა, რომელიც არ იყო მიმართული არავის არც დაზიანებისკენ და არც სიცოცხლის მოსპობისკენ", — განაცხადა მეხრიშვილმა.

შემთხვევის შედეგად დაზარალებული რამაზ ხარაზიშვილი, რომელსაც ფეხში ტყვია ჰქონდა მოხვედრილი, კლინიკიდან უკვე გაწერეს. ის პოლიციამ საავადმყოფოშივე გამოკითხა. ხარაზიშვილი ამბობდა, რომ რაგბის კავშირის ვიცე-პრეზიდენტმა, მერაბ ბესელიამ მას ზურგში ორჯერ ესროლა.

რაგბის კავშირის ვიცე-პრეზიდენტი, მერაბ ბესელია 16 სექტემბერს დააკავეს. საქმეზე გამოძიება საქართველოს სისხლის სამართლის კოდექსის ორი მუხლითაა დაწყებული — 118-ე, რომელიც ჯანმრთელობის განზრახ ნაკლებად მძიმე დაზიანებას და 236-ე, რომელიც ცეცხლსასროლი იარაღის ტარებას გულისხმობს.

გაიგე მეტი: