მორაგბე, რამაზ ხარაზიშვილი, რომელიც რაგბის კავშირის შეხვედრაზე დაჭრეს, აცხადებს, რომ ამავე კავშირის ვიცე-პრეზიდენტმა, მერაბ ბესელიამ მას ორჯერ ესროლა. სოციალურ ქსელში გამოქვეყნებულ პოსტში ის აღნიშნავს, რომ ბესელია ამ დროს ნასვამ მდგომარეობაში იყო. მორაგბის თქმით, ვიცე-პრეზიდენტთან მანამდე დაპირისპირება არ ჰქონია და ეს მას შემდეგ მოხდა, რაც საუბრის დროს ბესელიამ "კონტრკითხვაზე პასუხი ვერ გასცა".

"მას[მერაბ ბესელიას] და გამგეობის თავმჯდომარეს ჰქონდათ დაძაბული საუბარი რა დროსაც დამიძახა, დამისვა სხვადასხვა პროვოკაციული კითხვა , იყო აგრესიული და, როდესაც ჩემგან მიიღო ადეკვატური პასუხები და კონტრკითხვაზე პასუხი ვეღარ გამცა, ამოიღო იარაღი და მესროლა 2-ჯერ", — აცხადებს ხარაზიშვილი.

მორაგბე, ასევე, აკრიტიკებს რაგბის კავშირის წევრებს და აცხადებს, რომ ეს არის "ჩინოვნიკების ჯგუფი", რომლებმაც რაგბი კრიზისამდე მიიყვანეს.

"ყველასთვის ცნობილი და მარტივად გასაგები რომ გახდეს, რაგბის სამყარო ისევ ისეთია, როგორიც იყო და, რითიც აქამდე ასე ვამაყობდით. უბრალოდ, აქ არის ერთ მხარეს პატიოსანი და მშრომელი მოთამაშეები, მწვთნელები და ის ხალხი, ვის მხრებზეც ყველაფერი გადადის, ხოლო მეორე მხარეს ჩინოვნიკების ჯგუფი. ადამიანები, რომლებიც ბოლო 10 წელია მართავენ კავშირს, რაგბი ჩაძირეს და კრიზისამდე მიიყვანეს. ესეც არ აკმარეს და ახლა ჩირქს სცხებენ გუშინდელის მსგავსი ქმედებებით და ხალხის თვალში უკარგავენ ყველანაირ პატივისცემას", — აცხადებს მორაგბე.

რამაზ ხარაზიშვილი, ასევე, აღნიშნავს, რომ ოპერაციამ კარგად ჩაიარა და ძვალი არ არის დაზიანებული.

16 სექტემბერს რაგბის კავშირის ვიცე-პრეზიდენტი, მერაბ ბესელია დააკავეს. საქმეზე გამოძიება საქართველოს სისხლის სამართლის კოდექსის ორი მუხლითაა დაწყებული — 118-ე, რომელიც ჯანმრთელობის განზრახ ნაკლებად მძიმე დაზიანებას და 236-ე, რომელიც ცეცხლსასროლი იარაღის ტარებას გულისხმობს.

გაიგე მეტი: