გაფრთხილება: მასალა შეიცავს ძალადობრივი სცენის დეტალებს.

ამერიკის პრეზიდენტს, დონალდ ტრამპს ყოფილი მოდელი, ემი დორისი სექსუალურ ძალადობაში ადანაშაულებს. ამის შესახებ მედია გამოცემა The Guardian წერს.

მედიის ცნობით, მოდელი აცხადებს, რომ ინციდენტი 1997 წლის 5 სექტემბერს, ჩოგბურთის ტურნირის გახსნაზე მოხდა. მაშინ ემი 24 წლის იყო. გამოცემის ექსკლუზიურ ინტერვიუში, მოდელი შემზარავ დეტალებს იხსენებს და ამბობს, რომ მცდელობის მიუხედავად, მან ტრამპისგან თავის დაღწევა ვერ შეძლო.

"მან პირში ჩამიყო ენა. მას შემდეგ, რაც მე ხელის კვრით მისი თავიდან მოშორება ვცადე, ხელები მაგრად მომიჭირა და მთელს სხეულზე — მკერდზე, ზურგზე, ყველგან მეხებოდა. მის ხელებში ვიყავი და თავის დაღწევას ვერ ვახერხებდი", — იხსენებს ემი.

მოდელმა, მედია გამოცემას ფოტოები და ბილეთები მიაწოდა, რაც ამტკიცებს, რომ 1997 წელს ჩოგბურთის ტურნირზე რამდენიმე დღე ტრამპთან ერთად იმყოფებოდა. ამერიკის პრეზიდენტი მაშინ 51 წლის იყო.

ფოტო: Amy Dorris / The Guardian

დორისი იხსენებს, რომ 1997 წლის სექტემბერს ის ნიუ-იორკში თავის მეგობარ ბიჭთან, ჯეისონ ბინთან ერთად იყო. 5 სექტემბერს ჯეისონმა ემი აშშ-ს პრეზიდენტის გასაცნობად, მანჰეტენში, Trump Tower-ში წაიყვანა. ემი ინტერვიუში ტრამპთან პირველ შეხვედრაზეც საუბრობს.

"ის იმ ადამიანების რიცხვს მიეკუთვნებოდა, ვინც ფიქრობს, რომ მათ ყველაფრის უფლება აქვთ. მიუხედავად იმისა, რომ ჩემს მეგობარ ბიჭთან ერთად ვიყავი..", — განაცხადა ემიმ.

ემი ამბობს, რომ მოგვიანებით, ჩოგბურთის საყურებლად მათ ტრამპის მეგობრებიც შეუერთდნენ. მისი განცხადებით, ინციდენტი მაშინ მოხდა, როცა მან სააბაზანოთი სარგებლობა გადაწყვიტა. იქიდან გამოსვლის შემდეგ, მას გარეთ ტრამპი დახვდა.

"მაშინვე ვიფიქრე, იმიტომ მელოდებოდა, რომ სააბაზანოთი ესარგებლა. თუმცა, სამწუხაროდ, ეს ასე არ ყოფილა", — განაცხადა ემიმ.

მისი თქმით, მიუხედავად იმისა, ის ტრამპს "არას" ეუბნებოდა, ის არ გაჩერდა. მოდელი ამბობს, რომ არა აქვს მნიშვნელობა ვინ ხარ, შენთვის არა უნდა ნიშნავდეს — არას.

"შოკში ვიყავი, თუმცა ყველაფერს ვერ ვაანალიზებდი. სხვების გარემოცვაში სწრაფად დაბრუნება და ლაპარაკის გაგრძელება მინდოდა", — განაცხადა ემიმ.

იგი ამბობს, რომ კარგად არ ახსოვს მოუყვა თუ არა თავის მეგობარ ბიჭს ინციდენტის დეტალები, თუმცა მას უთხრა — ტრამპისთვის ეთქვა, მისთვის თავი დაენებებინა. ტრამპის ადვოკატის თქმით, აღნიშნულს კაცი არ ადასტურებს და ამბობს, რომ ვერ იხსენებს, ემის მისთვის ტრამპის არასათანადო ხასიათის ქმედებების შესახებ მოეყოლოს.

ინტერვიუში მოდელი, ასევე, ჰყვება, რომ მომდევნო დღეებში, მართალია ტრამპს მის მიმართ შეურაცხმყოფელი ქმედებები პირდაპირ აღარ განუხროციელებია, იგი მაინც არ წყვეტდა ემის დევნას.

"როცა ვინმეს სივრცეში იჭრები, არა აქვს მნიშვნელობა გაგაუპატიურეს თუ არა, ეს სექსუალური ძალადობაა. შენ არ გაქვს უფლება ვინმეს შეეხო, მანამ სანამ მათ არ ენდომებათ ეს. მე კი არაფერი გამიკეთებია იმისთვის, რომ ის შემხებოდა", — ამბობს ემი.

დონალდ ტრამპი, თავისი ადვოკატის მეშვეობით აღნიშნულ ბრალდებას უარყოფს და ამბობს, რომ მას ემი დორისის მიმართ შეურაცხმყოფელი, ძალადობრივი ან არასათანადო ხასიათის ქმედებები არასდროს განუხროციელებია.