საქართველოს მთავრობის ადმინისტრაციის უფროსის, ნათია მეზვრიშვილის თქმით, ქვეყნის მასშტაბით, მათ შორის, არც ბათუმში საგანგებო მდგომარეობის გამოცხადება და სრული კარანტინი არ იგეგმება. ამის შესახებ მან მთავრობის ადმინისტრაციაში გამართულ ბრიფინგზე ისაუბრა.

"ამ მხრივ, შეშფოთების საფუძველი არ არსებობს. თუმცა შეზღუდვები მიმდინარეობს ლოკალურად და წერტილოვნად იქ, სადაც ამის საჭიროება არსებობს. მაგალითად, ბათუმში გარკვეული შეზღუდვები მოქმედებს, ისევე როგორც შეზღუდვები დაწესებულია და ძალაშია სწავლასთან დაკავშირებით", — აცხადებს იგი.

16 სექტემბერს კორონავირუსის დადასტურებული 196 ახალი შემთხვევიდან 144 აჭარაში გამოვლინდა.

აჭარის ჯანდაცვის სამინისტროს ინფორმაციით, მკურნალობის კურსს გადის გადის 479 პაციენტი, აქედან 321 სამედიცინო დაწესებულებეში, 158 კი საკარანტინო სივრცეში მეთვალყურის ქვეშაა. გასული 24 საათის განმავლობაში აჭარაში ჩატარდა 4000-ზე მეტი PCR ტესტი, აქედან 144 შემთხვევაში პასუხი კორონავირუსზე დადებითია.

საქართველოში კორონავირუსის სულ 2 758 შემთხვევაა დადასტურებული. აქედან უკვე 1 412 გამოჯანმრთელდა, ხოლო 19 გარდაიცვალა.