ფრაქცია ქართული ოცნების თავმჯდომარის, რატი იონათამიშვილის თქმით, "პეიზაჟების ფონზე მოსეირნე სააკაშვილმა", ფაქტობრივად, თავისი და გუნდის მიერ ჩადენილი უმძიმესი დანაშაულებები აღიარა.

"2020 წლის საპარლამენტო არჩევნებზე, როგორც ჩანს, მათი ერთი ახალი სახე იქნება გუბაზ სანიკიძე, ხოლო ზუგდიდში მაჟორიტარობის კანდიდატი ისევ საკუთარი ოჯახის წევრი — მიხეილ სააკაშვილის დედაა. ეს არის შუა საუკუნეების მმართველის მენტალიტეტის გამოვლინება. ერთი პრობლემა ხომ ის არის, რომ ამ პარტიაში არავის სურს შესვლა, მასში გაწევრიანება და მასთან ასოცირება და მეორე ანომალია არის ის, რომ საკუთარ ოჯახის წევრს უშვებ იმ ბრძოლაში, რომელიც წინასწარ იცი, რომ წაგებული გაქვს და შედეგი იქნება კრახი", — განაცხადა რატი იონათამიშვილმა.

ნაციონალური მოძრაობის შესაძლო კანდიდატს ზუგდიდში გია ვოლსკიც გამოეხმაურა და მისი თქმით, ექსპრეზიდენტი მიხეილ სააკაშვილი "მანიით არის შეპყრობილი". ამის შესახებ მან პარლამენტში სიტყვით გამოსვლის დროს განაცხადა.

ნაციონალური მოძრაობის დეპუტატის, კობა ნაყოფიას განცხადებით, შესაძლოა, ექსპრეზიდენტის, მიხეილ სააკაშვილის დედა, გიული ალასანია ზუგდიდში მაჟორიტარობის კანდიდატი იყოს.