NDI-ის კვლევის თანახმად, მოსახლეობის 39 პროცენტი ფიქრობს, რომ ქვეყანა სწორი მიმართულებით ვითარდება. ამასთან, 32 მიიჩნევს, რომ ქვეყანა არასწორი მიმართულებით ვითარდება. გარდა ამისა, 20 პროცენტი აღნიშნავს, რომ საქართველო საერთოდ არ იცვლება.

ამავე კითხვაზე, 2019 წლის ნოემბერში მოსახლეობის 53-მა პროცენტმა თქვა, რომ ქვეყანა არასწორი მიმართულებით ვითარდებოდა. ხოლო მათი პროცენტული მაჩვენებელი, ვინც ქვეყნის სწორი მიმართულებით განვითარებაზე მიუთითებდა ნოემბრის შემდეგ 20 პროცენტული პუნქტით გაიზარდა.

ფოტო: NDI

NDI-ის ახალი კვლევისთვის კვლევის მეთოდი შეიცვალა და პირისპირ ინტერვიუების ნაცვლად, სატელეფონო ინტერვიუები ჩატარდა. ორგანიზაციაში აცხადებენ, რომ ახალი მონაცემების კვლევის წინა ტალღებთან შედარებისას გასათვალისწინებელია ინტერვიუს მეთოდის ცვლილება, რადგან ეს შესაძლოა ცდომილებაზე აისახოს.

საველე სამუშაოები მიმდინარეობდა 6-11 აგვისტოს და 2 045 ინტერვიუ ჩატარდა. კვლევის საშუალო ცდომილების ზღვარია +/- 1,3%.

ორგანიზაციის განცხადებით, რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით შეირჩნენ. NDI-ის ინფორმაციით, ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. მათივე თქმით, კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით).