სტრატეგია აღმაშენებლის იურიდიული მიმართულების ხელმძღვანელის, ანა კობახიძის თქმით, წლების განმავლობაში ქართული ოცნების და სუს-ის თანამშრომლების მიერ შერჩეულ კომისიის წევრებს მორჩილებით აძლევენ ხმას საოლქო საარჩევნო კომისიის ის წევრები, რომლებიც თავად ამავე ფორმით არიან დანიშნული ცესკოს მიერ.

კობახიძის განცხადებით, ხმების დაცვის კომისიამ ხელი შეუშალა რამდენიმე საოლქო კომისიას, სადაც ჩუმად უნდა მომხდარიყო საუბნო კომისიის წევრების არჩევა.

სტრატეგია აღმაშენებლის იურიდიული მიმართულების ხელმძღვანელს მიაჩნია, რომ ოპოზიციური პარტიების ერთიანი და კოორდინირებული მუშაობა შედეგს ყოველთვის გამოიღებს და არ მისცემს ხელისუფლებას არჩევნების გაყალბების საშუალებას.

"საოლქო საარჩევნო კომისიები გუშინ და დღეს ირჩევდნენ საუბნო საარჩევნო კომისიის ნეიტრალურ წევრებს. კანონით ასეთი წევრები ნამდვილად უნდა იყვნენ პარტიული კუთვნილების გარეშე და კომისიაში მათი მუშაობა უნდა იყოს ნეიტრალური და მიუკერძოებელი, თუმცა მერამდენე არჩევნებია უკვე, ასეთ პოზიციაზე აირჩევიან სწორედ პოლიტიკური ნიშნით ადამიანები ადმინისტრაციული რესურსის გამოყენებით. წლების განმავლობაში ქართული ოცნების და სუს-ის თანამშრომლების მიერ შერჩეულ კომისიის წევრებს მორჩილებით აძლევენ ხმას საოლქო საარჩევნო კომისიის ის წევრები, რომლებიც თავადვე ამავე მეთოდით არიან დანიშნული ცესკოს მიერ", — აცხადებს კობახიძე.

მისივე თქმით, დღეს ხმების დაცვის კომისიამ ხელი შეუშალა რამდენიმე საოლქო კომისიას ჩუმად აერჩია საუბნო კომისიის წევრები და ზოგიერთ შემთხვევაში კონკურსის თავიდან გამოცხადებაც კი მოუწევთ.

"ოპოზიციური პარტიების ერთიანი და კოორდინირებული მუშაობა, ვფიქრობ, ყოველთვის გამოიღებს შედეგს და ხელისუფლებას არ მისცემს საშუალებას ნაცადი ტრადიციული მეთოდებით ან ახლად მოფიქრებული მავნებლობებით არჩევნები გააყალბოს. ქართველი ხალხის ხმების დაცვას ვაპირებთ არჩევნების დღემდე და უშუალოდ კენჭისყრის დღესაც", — განაცხადა ანა კობახიძემ.

საქართველოში საპარლამენტო არჩევნები 31 ოქტომბერს გაიმართება.