დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ცაგერის მუნიციპალიტეტში 12 დადასტურებული შემთხვევის შემდეგ, სოფლებში ინტენსიური თერმოსკრინინგი, PCR ტესტირება დაიწყება და ღონისძიებები გამკაცრდება. მისივე თქმით, დაიდგმება კარავი და ყველა შემსვლელს შესაბამის ლაბორატორიულ PCR ტესტირებას შესთავაზებენ.

"აჭარის გარდა, ყურადღებას იპყრობს ცაგერის მუნიციპალიტეტის ე.წ. კლასტერი, რომელიც დაკავშირებული იყო ქორწილთან. 12 დადასტურებული შემთხვევიდან, ძირითადად, იმ ქორწილის მონაწილეები არიან, რომელიც თბილისში ჩატარდა და დანარჩენი მათი კონტაქტებია", — განაცხადა გამყრელიძემ.

მისივე თქმით, ცაგერის ე.წ. კლასტერი მუნიციპალიტეტს გასცდა და დაფიქსირდა ზუგდიდსა და ქუთაისშიც. ერთიანად არის 18 შემთხვევა, რომელიც ქორწილის გამართვას უკავშირდება.

ქვეყნის მასშტაბით, 10 სექტემბრის მონაცემებით, კორონავირუსის 57 ახალი შემთხვევა გამოვლინდა, გამოჯანმრთელდა 9 პაციენტი.