დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის თქმით, პანდემიის დროს "ღრეობების" ჩატარება არ შეიძლება და წყვილებს მოუწოდებს, ქორწილები "ძეობამდე" გადადონ. ამის შესახებ განცხადება იმნაძემ ტელეკომპანია იმედთან მიცემულ სატელეფონო ინტერვიუში გააკეთა.

"არ არის აუცილებელი პანდემიის დროს ღრეობები მოვაწყოთ, არანაირად გამართლებული არაა 200 და 300 კაციანი ქელეხები. იგივე ქორწილები, მესმის, რომ ბედნიერებაა, მაგრამ გადადონ ძეობამდე და მერე აღნიშნონ", — განაცხადა მან.

იმნაძე ამბობს, რომ 200 კაციანი ქელეხები არანაირად არ არის გამართლებული, მათ შორის, არც ეკლესიურად.

მისივე თქმით, იზრდება ისეთი შემთხვევების რიცხვი, სადაც უცნობია ინფიცირების წყარო, რაც კიდევ უფრო "შემაშფოთებელია".

პაატა იმნაძემ ასევე აღნიშნა, რომ სახელმწიფო აკეთებს ყველაფერს, თუმცა წარმოუდგენელია "თითო მაკონტროლებელი დასვა თითო ტრანსპორტში და თითო რესტორანში".

10 სექტემბრის მონაცემებით, საქართველოში კორონავირუსის 57 ახალი შემთხვევა გამოვლინდა, გამოჯანმრთელდა 9 პაციენტი, მონაცემები StopCov-ზე განახლდა.

ინფექციური საავადმყოფოს სამედიცინო დირექტორის, მარინა ეზუგბაიას თქმით, 57 ახალი შემთხვევიდან 5 დონასთან არის დაკავშირებული, 15 ბათუმთან, 18 დადასტურებულ შემთხვევათა კონტაქტებია, 4 აჭარაში მოგზაურობის ისტორიის მქონე პირია, 3 შემოტანილი შემთხვევაა, 5 სამედიცინო პერსონალია და რვა პაციენტზე წყაროს ეძებენ.

ჯამში, საქართველოში კორონავირუსის დადასტურებულ შემთხვევათა რაოდენობა 1 830-მდე გაიზარდა, ამათგან 1 334 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: