საშა ბარონ კოენის 2006 წლის კომედია ბორატი: ამერიკის კულტურული გამოკვლევა ყაზახეთის სახელოვანი ერის სასარგებლოდ, რომელიც ცნობილია უფრო მოკლე სახელით ბორატი, მალე გაგრძელებით დაგვიბრუნდება. ფილმის მეორე ნაწილი უკვე გადაღებულია.

ბორატ 2-ში კოენის ყაზახი ჟურნალისტი "ფიქრობს, რომ ის დიდი კინოვარსკვლავია, რადგან 2006 წლის ფილმმა ის ძალიან პოპულარული გახადა, ამიტომ ცდილობს, ხალხს დაემალოს, სხვა ადამიანად ასაღებს თავს და ხალხთან ინკოგნიტოდ იწყებს შეხვედრებსა და ინტერვიუების ჩაწერას".

ბოლო რამდენიმე თვის განმავლობაში კოენი არაერთი საჯარო ოინის ავტორი იყო, რის გამოც ბევრი ფანი იმაზე სპეკულირებდა, ის Who Is America?-ს მეორე სეზონზე მუშაობდა თუ რამე ახალ პროექტზე. ივნისის მიწურულს კოენმა ვაშინგტონში ულტრამემარჯვენეთა მიტინგი ჩაშალა და ხალხი დაარწმუნა, რომ მასთან ერთად რასისტული სიმღერა ემღერათ. ეს მიტინგი იარაღის პროპაგანდირებით ცნობილი Washington Three Percenters-ის ორგანიზებული "მარში ჩვენი უფლებებისთვის 3" იყო. კოენს კომბინეზონი ეცვა და ხელოვნური წვერი ეკეთა, მისი სიმღერის ტექსტში კი იყო ფრაზა იმაზე, რომ ბავშვებს "ვუხანის გრიპი" უნდა შეუყვანონ.

ფოტო: 20th Century Fox

7 ივლისს კოენი ნიუ-იორკის ყოფილი მერის, რუდი ჯულიანის, ინტერვიუში გამოჩნდა. ჯულიანი კორონავირუსის პანდემიასთან დაკავშირებით თეთრი სახლის პოზიციაზე საუბრობდა, როცა ქალ ჟურნალისტთან ინტერვიუს დროს ვიღაც კაცი შემოვარდა "გიჟური ჩაცმულობით", რომელიც მოიცავდა "ნახევრადგამჭვირვალე ბადისებრ ტოპსა და ვარდისფერ ბიკინის". ყოფილმა მერმა ამ ოინს "აბსურდული" უწოდა.

აგვისტოს მიწურულს TikTok-ზე კოენის ვირუსული ვიდეო გავრცელდა, რომელშიც ის ბორატის პერსონაჟივითაა გამოწყობილი და გზატკეცილზე მიქრის. ამ ვიდეომ გაზარდა ჭორები იმაზე, რომ კოენი ბორატის მეორე ნაწილზე მუშაობდა, თუმცა უცნობი იყო, ეს ოინი რამენაირად უკავშირდებოდა თუ არა წინებს. ბორატ 2-ისთვის Collider-ის სიუჟეტის სინოფსისს თუ გავითვალისწინებთ, როგორც ჩანს, კოენი მთელი ამ დროის განმავლობაში ფილმის მეორე ნაწილს იღებდა. პროექტი ასეა აღწერილი: "კოენი თამაშობს ბორატს, რომელიც თამაშობს კოენს".

2006 წელს ბორატს გლობალურად $260 მილიონი ჰქონდა შემოსავალი. კოენმა ოქროს გლობუსი მოიგო საუკეთესო მსახიობისთვის კომედიურ ფილმში, ოსკარზე კი ფილმმა საუკეთესო ადაპტირებული სცენარის ნომინაცია მოიპოვა.

ფოტო: Giphy