ცნობილი ამერიკული რეალითი შოუ Keeping Up with the Kardashians მომავალ წელს მეოცე სეზონის გამოსვლის შემდეგ დასრულდება.

ამის შესახებ ინფორმაცია კარდაშიანებისა და ჯენერების ოჯახის წარმომადგენლებმა ერთობლივი განცხადებით გაავრცელეს:

"14 წლის, 20 სეზონის, ასეულობით ეპიზოდისა და რამდენიმე სპინოფ შოუს შემდეგ ჩვენ, როგორც ოჯახმა, გადავწყვიტეთ, რომ ეს განსაკუთრებული მოგზაურობა დავასრულოთ. მადლობელი ვართ ყველასი, ვინც ამ წლების განმავლობაში თვალს გვადევნებდით და ჩვენთან ერთად იზიარებდით კარგ თუ ცუდ პერიოდებს, ბედნიერებას, ცრემლებს და ურთიერთობებს. მუდამ გავუფრთხილდებით ამ შესანიშნავ მოგონებებსა და იმ უამრავ ადამიანს, რომელთაც ამ გრძელ გზაზე შევხვდით", — ვკითხულობთ განცხადებაში, რომელსაც ხელს კრის ჯენერი, კორტნი კარდაშიანი, კიმ კარდაშიან-ვესტი, ქლოი კარდაშიანი, რობ კარდაშიანი, კენდალ ჯენერი, კაილი ჯენერი და სკოტ დისიკი აწერენ.

Keeping Up with the Kardashians-ის პრემიერა 2007 წელს შედგა და მალევე ის პოპკულტურის ნამდვილი სენსაცია გახდა: ამ პროექტმა სატელევიზიო შოუების ისტორიაში ერთ-ერთი ყველაზე პოპულარული რეალითი შოუს სტატუსის მოპოვებასთან ერთად სხვა მსგავსი შოუების წარმატებასაც შეუწყო ხელი.

როგორც The Guardian წერს, შოუ თავდაპირველად კრის კარდაშიანისა და მისი შვილების — კიმის, კორტნისა და ქლოის ირგვლივ ვითარდებოდა, შემდეგ კი მათ შედარებით ახალგაზრდა კენდალი და კაილი ჯენერებიც შეუერთდნენ. Keeping Up with the Kardashians მათი ყოველდღიური ცხოვრების ისეთი დეტალების შესახებ მოუთხრობდა მაყურებელს, როგორიცაა სასიყვარულო თუ საქმიანი ურთიერთობები.

შოუმ კარდაშიან-ჯენერების ოჯახი მთელ მსოფლიოში ერთ-ერთ ყველაზე მდიდარ და გავლენიან სახეებად აქცია: ისინი ფლობენ არაერთ მსხვილ ბიზნესს და მათი შემოსავლები მილიარდებს აღემატება.

"ამ პროექტის გარეშე არ ვიქნებოდი ის, ვინც დღეს ვარ. წარმოუდგენლად მადლობელი ვარ ყველასი, ვინც გვიყურებდა და მხარს გვიჭერდა მე და ჩემს ოჯახს ამ 14 შესანიშნავი წლის განმავლობაში", — წერს კიმ კარდაშიანი თავის ინსტაგრამზე, სადაც 188 მილიონზე მეტი გამომწერი ჰყავს.