იუსტიციის მინისტრმა, თეა წულუკიანმა რუსთავი 2-ის ჟურნალისტის შეკითხვას — იქნება თუ არა მიხეილ სააკაშვილის ციხეში ყოფნა კომფორტული ქართული ოცნებისთვის, უპასუხა, რომ დღევანდელი ციხე "უმაღლესი საერთაშორისო სტანდარტებით" იმართება, ამიტომ საუკეთესო კვება ექნება სააკაშვილს, რადგან პატიმრებს უკვე "ნედლი ხორცითა" და "სეზონური ხილით" კვებავენ.

"კარგი კვება არის პატიმრისთვის პოლიტიკური საკითხი. როდესაც მათი დაღლილი პოლიტიკოსები შედიან ციხეში და იქიდან გამოდიან ხოლმე ნაკვებნი და მოსუქებულები, ეს პოლიტიკური საკითხია და იგივე ბედი ელის ბატონ მიშას", — ამბობს წულუკიანი.

გაიგეთ მეტი:

სააკაშვილმა საქართველოში დაბრუნება არაერთხელ დააანონსა. მათ შორის, ექსპრეზიდენტი აქტურად პირდებოდა მოსახლეობას დაბრუნებას წინასაარჩევნო პერიოდებში, თუმცა ამ დრომდე არ ჩამოსულა. მის წინააღმდეგ საქართველოში რამდენიმე სისხლის სამართლის საქმეზე განაჩენია გამოტანილი და ის დამნაშავედაა ცნობილი.

წინასაარჩევნო პერიოდში მორიგი დაპირების გაჟღერების შემდეგ, მმართველ გუნდში, ქართულ ოცნებაში განაცხადეს, რომ მიხეილ სააკაშვილს საქართველოში ჩამოსვლის შემთხვევაში ციხე ელის.