საქართველოს სახალხო დამცველი შინაგან საქმეთა სამინისტროს მოუწოდებს, დროულად დაიწყოს გამოძიება პანკისის სათემო რადიოსა და მისი დამფუძნებლის, გელა მთივლიშვილის წინააღმდეგ განხორციელებული მუქარის საქმეზე.

ომბუდსმენი, ასევე, მოუწოდებს უწყებას, შეაფასოს გელა მთივლიშვილისა და პანკისის რადიოს სხვა თანამშრომლებისთვის ჟურნალისტურ საქმიანობაში ხელშეშლის რისკები და მიიღოს სათანადო ზომები მათთვის უსაფრთხო სამუშაო გარემოს უზრუნველსაყოფად.

5 სექტემბერს, ხეობაში პანკისის სათემო რადიოსა და მისი დამფუძნებლების წინააღმდეგ საპროტესტო აქცია გაიმართა. აქციის მონაწილეები ხეობიდან რადიოს დამფუძნებლისა და ჟურნალისტის, გელა მთივლიშვილის წასვლას მოითხოვენ და ოფისის დარბევით იმუქრებოდნენ. ისინი აცხადებდნენ, რომ პანკისის სათემო რადიო არაობიექტურად აშუქებს ხეობაში განვითარებულ მოვლენებს.

2020 წლის 4 სექტემბერს, პანკისის სათემო რადიოს დამფუძნებელმა განცხადებით მიმართა საქართველოს გენერალურ პროკურორს, ირაკლი შოთაძეს და გამოძიების დაწყება მოითხოვა.

მუქარის გამო, მოსალოდნელი თავდასხმის/ძალადობის თავიდან აცილების მიზნით, პანკისის სათემო რადიოს ხელმძღვანელობამ 5 სექტემბერს გააუქმა ხეობაში, ჟურნალისტური საქმიანობისა და ტექნიკური სამუშაოების განსახორციელებლად დაგეგმილი სამუშაოები და მივლინებები. ისინი არ გამორიცხავენ, რომ გარკვეულმა ჯგუფებმა რადიოს სტუდია დაარბიონ.