ევროპული საქართველოს ლიდერმა, გიგა ბოკერიამ, საქართველოს ყოფილი პრეზიდენტის და ნაციონალური მოძრაობის პრემიერმინისტრობის კანდიდატის მიხეილ სააკაშვილის წინასაარჩევნო ვიდეომიმართვას სადღეგრძელო უწოდა. ამის შესახებ მან TV პირველის ეთერში განაცხადა.

"ერთი თვის წინ თქვა, არცერთ შემთხვევაში, არცერთ თანამდებობაზე არ ვიქნებიო. რაღაცას რომ ამბობ, იმას ფასი ხომ უნდა ჰქონდეს. ახლა იძახის პრემიერად მოვალო, დაახლოებით ოცდაათჯერ მაინც აქვს ნათქვამი რომ დაბრუნდება. ბიძინა ივანიშვილი რომ წავა, რა თქმა უნდა, დაბრუნდება და ეს ასეც უნდა იყოს. მთავარია ახლა რა ხდება, რაც ახლა მოვისმინეთ წმინდა წყლის სადღეგრძელოა", — განაცხადა გიგა ბოკერიამ.

სააკაშვილმა მორიგი წინასაარჩევნო ვიდეომიმართვა გაავრცელა, რომელშიც დაპირებებიც გააჟღერა. ტრადიციულად, სააკაშვილმა საქართველოს მონატრებაზე ისაუბრა და დაპირდა ამომრჩეველს ემიგრანტების ქვეყანაში დაბრუნებას, განათლებისა და ჯანდაცვის სისტემის ხარისხის გამოსწორებას და მდიდარი ქვეყნის შექმნას დაპირდა.

ამავე ვიდეომიმართვაში, მან ისევ მოუბოდიშა საზოგადოებას წარსულში დაშვებული შეცდომების გამო და განაცხადა, რომ "გამოსასწორებლად" შანსი სჭირდება. რაც შეეხება გამოსწორების გზას, ის სამომავლოდ სასამართლო სისტემის ხელისუფლებისგან დაცვისა და საგამოძიებო უწყებების სახელისუფლებო კონტროლისგან ჩამოშორების პირობას დებს.

გაიგეთ მეტი:

სააკაშვილმა საქართველოში დაბრუნება არაერთხელ დააანონსა. მათ შორის, ექსპრეზიდენტი აქტურად პირდებოდა მოსახლეობას დაბრუნებას წინასაარჩევნო პერიოდებში, თუმცა ამ დრომდე არ ჩამოსულა. მის წინააღმდეგ საქართველოში რამდენიმე სისხლის სამართლის საქმეზე განაჩენია გამოტანილი და ის დამნაშავედაა ცნობილი.

წინასაარჩევნო პერიოდში მორიგი დაპირების გაჟღერების შემდეგ, მმართველ გუნდში, ქართულ ოცნებაში განაცხადეს, რომ მიხეილ სააკაშვილს საქართველოში ჩამოსვლის შემთხვევაში ციხე ელის.