სტრატეგია აღმაშენებლის სპიკერი თეონა აქუბარდია ქვეყანაში შექმნილ მძიმე კრიმინოგენულ მდგომარეობას პოლიციის სისტემაში არსებულ მენეჯმენტურ ხარვეზებს უკავშირებს და პოლიციელების მძიმე ფინანსურ მდგომარეობაზე საუბრობს.

"პოლიციელები არიან დამსახურებული მოქალაქეები, რომლებიც იცავენ ჩვენს, თითოეული მოქალაქის უსაფრთხოებას, ამიტომ მნიშვნელოვანია მათი ფინანსური უზრუნველყოფა სათანადო ხელფასის სახით. თუმცა სისტემაში არსებობს საკმაოდ ბევრი სხვა ხარვეზი, რომლის სათავეც მენეჯმენტშია. მიმაჩნია, რომ პოლიციის სისტემის რეფორმა, რომელიც ჩვენმა პოლიტიკურმა მოძრაობამ შეიმუშავა და რომელშიც ჩართულები იყვნენ ამ სფეროს ექსპერტები, დღეს არსებულ მძიმე მდგომარეობას დაარეგულირებს, პოლიცია აღარ იქნება პოლიტიზირებული და ის იზრუნებს ჩვენს უსაფრთხოებაზე", — განაცხადა თეონა აქუბარდიამ და გეგმის განხორციელების შემდგომი ნაბიჯების მნიშვნელოვან კომპონენტებს შეეხო.

"ცნობილია, რომ ამ სისტემის ერთ-ერთი პრობლემური ნაწილი და უკვე აქილევსის ქუსლად წოდებული - გამოძიებაა, რის გამოც დანაშაულის გახსნა არ ხდება და მრავალი დამნაშავე ჯერ კიდევ დაუსჯელი დადის ქუჩაში. იმისთვის, რომ ჩვენ გავხსნათ კრიმინალური საქმეები ამისთვის მნიშვნელოვანია მოდერნიზირებული ლაბორატორიები საგამოძიებო სამსახურისთვის და თანამედროვე ტექნოლოგიების გამოყენება გამოძიებაში. ხშირად უსმენთ, ალბათ, საჯარო განხილვებს გამოძიებასთან დაკავშირებით, განსაკუთრებით ბოლო ორი თვეა ამასთან დაკავშირებით მიმდინარეობს მსჯელობა, დისკუსია და რეალურ პრობლემაზე არავინ საუბრობს. სად ვიჭედებით? დღეს ფაქტობრივად არ ხდება ტექნოლოგიების გამოყენება, არ გაგვაჩნია მოდერნიზებული ლაბორატორიები, რომლებიც თანამედროვე ტექნიკით იქნება აღჭურვილი," – აღნიშნავს აქუბარდია.

სტრატეგია აღამაშენებლის სპიკერისთვის გაუგებარია, როცა საუბრობენ და მანიპულირებენ სტატისტიკასთან დაკავშირებით:

"სტატისტიკა, რომელიც ჩვენ ხელთ გვაქვს და რომელიც საკმაოდ კატასტროფულია, მის ოფიციალურობას შინაგან საქმეთა სამინისტრო ეჭვქვეშ აყენებს და საპირისპიროს აქვეყნებს, თითქოს 2017 წლიდან გაუმჯობესდა ქვეყანაში არსებული კრიმინოგენური მდგომარეობის შეფასების სტატისტიკა. ჩვენ ახალი მიდგომებით ევროპული სტანდარტებით მოვახდენთ დანაშაულის აღრიცხვას, ჩვენ გეგმაში გვაქვს, რომ ეს სტატისტიკა იყოს ევროპულ სტანდარტებთან შესაბამისობაში", — აღნიშნავს აქუბარდია.

რეფორმის ერთ-ერთ მნიშვნელოვან კომპონენტად თეონა აქუბარდია მოქალაქეების მოსმენებს ასახელებს, რაც დაუშვებელია.

"აქ არ არის საუბარი კრიმინალის მოსმენებზე, აქ არის საუბარი მშვიდობიანი მოქალაქეების მოსმენაზე. საქართველოში ტელეფონზე მოსმენა ხდება არამართლზომიერად და ამის გამოძიება და დამტკიცება ძალიან რთულია. ამიტომ შინაგან საქმეთა სამინისტროში მოქალაქეების არამართლზომიერი მოსმენები უნდა შეჩერდეს და ეს არის ჩვენი გეგმის ერთ-ერთი მნიშვნელოვანი კომპონენტი. პოლიციელის, რომელიც იცავს თითოეული ადამიანის უსაფრთხოებას და სიცოცხლეს, აუცილებელია ჰქონდეს მაღალი კომპეტენცია და ეს კომპეტენცია არ არის მხოლოდ ერთჯერადი უმაღლესი განათლების მიღების შესაძლებლობა, ნემისმიერ დასავლურ ქვეყანაში განათლება არის უწყვეტი პროცესი. ჩვენ ვაპირებთ, რომ ეს უწყვეტი განათლება მივცეთ პოლიციელებს, მუდმივი ტრენინგების, შესაბამისი კურსების სახით.

განათლებული პოლიციელი გარანტიაა იმისა, რომ ჩვენი უსაფრთხოება იქნება დაცული კანონის ფარგლებში, მაღალ კომპეტენტურ დონეზე. დღეს მიუხედავად იმისა, რომ პოლიციელის ნდობა საზოგადოებაში მაღალია, საკმაოდ დაბალია შინაგან საქმეთა სამინისტროს მიმართ საზოგადოების მხარდაჭერა. ამიტომაც, ეს არის სისტემური და პოლიტიკური პრობლემა. ამიტომ იმისთვის, რომ ჩვენ გვქონდეს ნდობა ჩვენი სამართალდამცავი სტრუქტურების და ხდებოდეს მოქალაქეების მხრიდან გაკონტროლება და სამსახურის ზედამხედველობა, ჩვენ გთავაზობთ საზოგადოების მაღალ ჩართულობის კომპონენტის შემოტანას საპოლიციო სამსახურში. თითოეულმა ადამიანმა იცოდეს, რა ხდება ამ გამოძიების მიმართულებით და თქვენი ხმა და თქვენი მოსაზრება იყოს გათვალისწინებული", — განაცხადა აქუბარდიამ.