აჭარის მთავრობის ყოფილი თავმჯდომარისა და უკრაინის საინვესტიციო ოფისის ხელმძღვანელი, ლევან ვარშალომიძე ფიქრობს, რომ "მიხეილ სააკაშვილმა საქართველო უნდა მართოს, რადგან ეს ქვეყანა მან შექმნა". ამის შესახებ მან ტვ პირველთან საუბრის დროს განაცხადა.

“მიხეილ სააკაშვილი არამარტო უნდა ჩამოვიდეს, არამედ უნდა მართოს ეს ქვეყანაც იმიტომ, რომ ამ კაცმა შექმნა ეს ქვეყანა და დღეს მართლაც სირცხვილია, როცა მესამე პრეზიდენტი საერთოდ ქვეყანაში არ იმყოფება და საქართველოს პასპორტი არ გააჩნია. მე აქ უცხოს ვერაფერს ვხედავ. მე პირადად ვამაყობ, რომ მისი გუნდის წევრი ვარ. მისი გუნდის წევრობის დროს შეიქმნა ეს სასწაულები, როგორიც ბათუმის სასწაულია და სხვა საქართველოს აღმშენებლობა. ამიტომ, მისი ჩამოსვლაც, გაპრემიერებაც და მმართველობაც შესაძლებელია. ამას, უბრალოდ, ბრძოლა სჭირდება. მეც აქ ვარ, ქართველი ხალხიც აქ იქნება", — თქვა ვარშალომიძემ.

ლევან ვარშალომიძე ბათუმში ჩავიდა და მიიღო გადაწყვეტილება, მაჟორიტარად ეყარა კენჭი და საქართველოს პარლამენტარობისთვის ებრძოლა.

ვარშალომიძემდე საქართველოში ჩამოსვლა და "არჩევნებში წინა ხაზზე ბრძოლა" დააანონსა ნაციონალური მოძრაობის ლიდერმა და ექსპრეზიდენტმა მიხეილ სააკაშვილმაც. ეს პირველი შემთხვევა არ არის, როდესაც ის დაბრუნების პირობას დებს. ერთიან ნაციონალურ მოძრაობაში არ გამორიცხავენ, სწორედ მიხეილ სააკაშვილი იყოს პრემიერობის კანდიდატი.