ექსპრეზიდენტი მიხეილ სააკაშვილი ვიდეომიმართვას ავრცელებს, რომელშიც საქართველოს მოსახლეობას ბოდიშს უხდის. სააკაშვილი აღიარებს, რომ მისი მმართველობის პერიოდში იყო "ძალიან მძიმე შეცდომები", თუმცა იქვე ამატებს, რომ ხალხისთვის უკეთესი, "ბევრად მდიდრული" ცხოვრება უნდოდა.

"ახლა წლების გადმოსახედიდან ვიცი, თუ უკეთესად როგორ უნდა ვემსახურო ჩვენს ქვეყანას, როგორ ავიცილოთ თავიდან შეცდომები... და შეცდომები რა თქმა უნდა იყო და იყო ძალიან მძიმე შეცდომებიც, მაგრამ ღმერთია მოწამე, ყველაფერი საუკეთესო მინდოდა ჩემი ხალხისთვის.

მინდოდა რომ ჩემს ხალხს ეცხოვრა უკეთესად, ბევრად უფრო მდიდრულად და მაინც ამ წლების გადმოსახედიდან ამ შეცდომების გამო, რომელიც დავუშვი იმის გამო, რაც ბოლომდე ვერ გავაკეთე, მინდა ყველას საჯაროდ მოგიხადოთ ბოდიში", — აცხადებს სააკაშვილი.

ვიდეომიმართვაში, რომელიც სააკაშვილმა წინასაარჩევნოდ გაავრცელა ხაზგასმულია ისიც, რა გააკეთა ქვეყნისთვის და ისიც, რომ ახლა გასაკეთებელი კიდევ ბევრია. ის ისევ ჰპირდება ამომრჩეველს დაბრუნებას, თუმცა წინა დაპირებებისგან განსხვავებით, არ აკონკრეტებს როდის.

"მე ვარ უსაზღვროდ მადლიერი ქართველი ხალხის, რომელმაც მაქცია ქართული სახელმწიფოს მშენებლობის წარმატებული ისტორიული პროცესის მონაწილედ. ამ შვიდი წლის განმავლობაში არ ყოფილა არც ერთი დღე რომ მე არ დავინტერესებულიყავი საქართველოს ამბებით და ვიცი ზუსტად, რომ ჩემს მუშაობას პრეზიდენტის თანამდებობაზე ფუჭად არ ჩაუვლია და ბევრი რამე რაც ჩვენ შევქმენით დღესაც შენარჩუნებულია და მუშაობს, მაგრამ ამავე დროს, როდესაც საქართველოს ამბებს ვისმენ ზუსტად ვხვდები და ვიცი რომ ჩვენ შეგვიძლია ვიცხოვროთ ბევრად უფრო მაგრად, ბევრად უკეთესად და თითოეულ ქართველს შეუძლია იყოს მდიდარი და ეს ჩვენ ერთად გამოგვივა! მე ვბრუნდები!" — აცხადებს ის.

2012 წლის არჩევნებში ნაციონალური მოძრაობის დამარცხებისა და საპრეზიდენტო ვადის ამოწურვის შემდეგ მიხეილ სააკაშვილმა საქართველო დატოვა. მის წინააღმდეგ ქვეყანაში რამდენიმე საქმეა აღძრული. სააკაშვილს ავტორიტარულ მმართველობაში, რეკეტში, მედიასე ზეწოლასა და აქციების ძალადობრივად დაშლაში ადანაშაულებენ არამხოლოდ მმართველი გუნდის, არამედ ოპოზიციის წევრები.

ამ დრომდე სააკაშვილმა არაერთხელ განაცხადა, რომ საქართველოში დაბრუნდებოდა და "ივანიშვილის მმართველობას დაასრულებდა". ამას ჰპირდებოდა ის ამომრჩეველს, როგორც თვითმართველობის, ასევე, საპრეზიდენტო არჩევნების წინ.