სახელმწიფო უსაფრთხოების სამსახურმა განცხადება გაავრცელა, რომლის თანახმადაც, სუს-ს თამარ ბაჩალიაშვილის საქმესთან კავშირი არ აქვს.

სახელმწიფო უსაფრთხოების სამსახურის ცნობით, გავრცელებული ინფორმაცია არასწორია და უწყებისა და მისი თანამშრომლების დისკრედიტაციისა და საზოგადოების შეცდომაში შეყვანის მიზანი აქვს.

"აღნიშნული ცრუ ვერსიების გავრცელების უკან დგანან პოლიტიკურად ანგაჟირებულ პირთა ჯგუფები და კონკრეტული მედია საშუალებები. სახელმწიფო უსაფრთხოების სამსახურის ავტომობილების გადაადგილება აღნიშნულ მარშრუტზე ხორციელდება ყოველდღიურად, რაც უკავშირდება თანამშრომლების მიერ დაკისრებული მოვალეობების კეთილსინდისიერად და ღირსეულად შესრულებას", — ნათქვამია განცხადებაში.

სახელმწიფო უსაფრთხოების სამსახური ყველას მოუწოდებს, არასწორი ინფორმაციის გავრცელებისგან თავი შეიკავონ და გამოძიების შედეგებს დაელოდონ.

მთავარი არხის გენერალურმა დირექტორმა, ნიკა გვარამიამ გადაცემა მთავარ აქცენტებში თქვა, რომ თამარ ბაჩალიაშვილს სუს-ის სამი ავტომობილი დაჰყვებოდა და უთვალთვალებდა. მან მანქანების სანომრე ნიშნებიც გაასაჯაროვა.

საეჭვო მანქანებთან დაკავშირებით კითხვები ჰქონდათ თამარ ბაჩალიაშვილის ოჯახის წევრებსაც.

ინფორმაცია, რომ სახელმწიფოს უსაფრთხოების სამსახურის 3 მანქანა თამარ ბაჩალიაშვილის ავტომობილს დაჰყვებოდა, პროკურატურამაც უარყო.

უწყების მტკიცებით, სუს-ის მანქანები ბაჩალიაშვილის ავტომანქანის უკან გზის მხოლოდ გარკვეულ ნაწილზე აღმოჩნდნენ, რის შემდეგაც შავნადაბას საწვრთნელი ბაზისკენ გადაუხვიეს. მათივე თქმით, ბაჩალიაშვილმა სვლა შეუფერხებლად გააგრძელა.

"აღნიშნული ავტომანქანები რუსთავის გზატკეცილზე, მხოლოდ გარკვეულ მონაკვეთზე აღმოჩნდნენ თამარ ბაჩალიაშვილის ავტომანქანის უკან, რის შემდეგაც თბილისი-მარნეულის გზატკეცილიდან აღნიშნულმა ავტომანქანებმა გადაუხვიეს გზიდან და შევიდნენ შავნაბადას საწვრთნელ ბაზაზე, ხოლო თამარ ბაჩალიაშვილმა კუთვნილი ავტომანქანით შეუფერხებლად გააგრძელა გადაადგილება ჯერ ფონიჭალის მიმართულებით, ხოლო შემდეგ თბილისი-მარნეულის გზატკეცილზე", — აღნიშნულია განცხადებაში.