პარლამენტის თავდაცვისა და უსაფრთხოების კომიტეტის თავმჯდომარე, ირაკლი სესიაშვილი აცხადებს, რომ ექსპრეზიდენტი მიხეილ სააკაშვილის ბოდიშის არავინ არ სჯერა და "ის უსინდისოდ ნათქვამია".

"როცა 8 წლის განმავლობაში არ მოიხდი ბოდიშს და 8 წლის შემდეგ ბოდიშზე მიდიხარ ისევ და ისევ ძალაუფლებისთვის და იმისთვის, რომ არჩევნებზე გარკვეული ქულები დაიწერო, ამ ბოდიშის არავის სჯერა, ეს არის უსინდისოდ ნათქვამი ბოდიში. და თუ ის ბოდიშს იხდის მკვლელობებზე, წამებებზე, ქონების წართმევაზე, ამაზე ბოდიში არ კმარა. ამაზე არის სისხლის სამართლის კოდექსის შესაბამისი პასუხისმგებლობა", — აცხადებს სესიაშვილი.

წინასაარჩევნოდ ექსპრეზიდენტმა, მიხეილ სააკაშვილმა ვიდეომიმართვა გაავრცელა, სადაც საქართველოს მოსახლეობას დაშვებული შეცდომების გამო ბოდიშს უხდის. ექსპრეზიდენტი ისევ ჰპირდება ამომრჩეველს დაბრუნებას, თუმცა წინა დაპირებებისგან განსხვავებით, არ აკონკრეტებს როდის.

ამ დრომდე სააკაშვილმა არაერთხელ განაცხადა, რომ საქართველოში დაბრუნდებოდა და "ივანიშვილის მმართველობას დაასრულებდა". ამას ჰპირდებოდა ის ამომრჩეველს, როგორც თვითმართველობის, ასევე, საპრეზიდენტო არჩევნების წინ.