ეკონომიკის მინისტრის, ნათია თურნავას თქმით, ექსპრეზიდენტმა, მიხეილ სააკაშვილმა საკუთარი თანაგუნდელებიც დაღალა. ასე გამოეხმაურა მინისტრი სააკაშვილის მიერ გავრცელებულ ვიდეომიმართვას, რომელშიც ექსპრეზიდენტმა ქართველ ხალხს ბოდიში მოუხადა.

"მე ვფიქრობ, რომ არასერიოზულია ეს ყველაფერი და ძალიან დაიღლა უკვე საზოგადოება. სერიოზულ კომენტარს ამაზე ვერ გავაკეთებ. რა სერიოზულ კომენტარს ელოდებით ჩემგან ამ ყოვლად არასერიოზულ ამბავზე? მგონი, საკუთარი თანაგუნდელებიც უკვე დაღალა", — თქვა ეკონომიკის მინისტრმა მთავრობის სხდომის შემდეგ.

საქართველოს ყოფილმა პრეზიდენტმა, მიხეილ სააკაშვილმა დღეს, 27 აგვისტოს ვიდეომიმართვა გაავრცელა, სადაც ამბობს, რომ მისი მმართველობის დროს ძალიან მძიმე შეცდომები დაიშვა და ქართველ ხალხს ბოდიში მოუხადა.