სახალხო დამცველის, ნინო ლომჯარიას განცხადებით, თუ პოლიციას ჰქონდა ინფორმაცია იმის შესახებ, რომ 11 წლის ბავშვზე მამა ძალადობდა, მაშინ უნდა დაიწყოს გამოძიება იმის გასარკვევად, რატომ არ ჰქონდა უწყებას შესაბამისი რეაგირება. მისი განმარტებით, არასრულწლოვნის გარდაცვალება ცხადყოფს იმ სისტემურ პრობლემებს, რაც ბავშვის ძალადობისგან დაცვის მიმართულებით არის ქვეყანაში.

"პირველ რიგში, რა თქმა უნდა, გამოძიებამ უნდა დაადგინოს გარდაცვალების გარემოებები. თუმცა, ასევე, გამოძიების საგანი უნდა გახდეს, თუკი პოლიციას ჰქონდა შეტყობინებები, რატომ არ იყო შესაბამისი ორგანოების მხრიდან ეფექტური და დროული რეაგირება. ასევე, რატომ ვერ მოახდინა პოლიციამ ძალადობის პრევენცია ბავშვის მიმართ, მითუმეტეს, თუ წლების განმავლობაში სისტემური იყო ძალადობა. ასევე, რატომ არ იყო ინფორმირებული სოციალური სამსახური და რატომ არ იყო ჩართული ბავშვის მდგომარეობის შესწავლის პროცესში შესაბამისი სოციალური მუშაკი?", — განაცხადა მან.

ამავე თემაზე სახალხო დამცველმა სოციალურ ქსელში პოსტიც გამოაქვეყნა, სადაც განაცხადა, რომ სოციალურ სამსახურს არა აქვს საკმარისი რესურსი, სამართალდამცავ უწყებას კი ბავშვთა მიმართ ძალადობის პრევენციის კვალიფიკაცია.

"ჩვენ ქვეყანაში ბავშვები ოჯახში თუ საჯარო სივრცეში მარტონი არიან ძალადობის პირისპირ, რადგან:

  • მათ არა აქვთ ინფორმაცია, ვის მიმართონ და რა მოითხოვონ, რადგან სკოლაში ამას არავინ ასწავლით;
  • არ აქვთ გარშემომყოფთა იმედი, რადგან ბავშვს არავინ უსმენს და კიდევ უფრო იშვიათად უჯერებს;
  • ბავშვზე ზრუნვისა და დაცვის სისტემა არსებითი გამოწვევების წინაშე დგას;
  • არ არსებობს ოჯახში ძალადობის მსხვერპლი ბავშვების მხარდაჭერის ეფექტური სერვისი, მინიმალურია მათთან ფსიქოლოგის ჩართულობა;
  • არაერთი ინიციატივა ბავშვის უფლებების სწავლების თუ ოჯახში ძალადობისაგან დაცვის მექანიზმების მხარდასაჭერად რელიგიური თუ ფსევდო პატრიოტული წინააღმდეგობების გამო ფერხდება.

და ბოლოს, ხაზი უნდა გაესვას ყველა იმ პირის პასუხისმგებლობას, ვინც იცოდა ბავშვის მიმართ ძალადობის თაობაზე, არ დაიცვა, ან დატოვა ის მოძალადის ხელში", — წერს ლომჯარია.

თერჯოლაში არასრულწლოვანის თვითმკვლელობამდე მიყვანის ბრალდებით მამა 24 აგვისტოს დააკავეს. უწყების განცხადებით, ბრალდებული 11 წლის შვილზე სისტემატურად ძალადობდა.