პირველი საუნივერსიტეტო კლინიკის ექიმის, ლევან რატიანის განცხადებით, შატილში მომხდარი ავარიის შედეგად დაზარალებული 3 პაციენტის მდგომარეობა ისევ კრიტიკულია.

"სამივეს მდგომარეობა არის ამ ეტაპზე კრიტიკული, თუმცა ვინარჩუნებთ ვიტალურ პარამეტრებს. ვიმედოვნებთ, რომ გაგრძელდება ასე და სამივე მათგანი უახლოეს პერიოდში დაიწყებს გამოჯანმრთელებას", — აცხადებს რატიანი.

რატიანი ამბობს იმასაც, რომ პაციენტების საშუალო ასაკი არის 25 წელი, სამივე მდედრობითი სქესისაა, სამივე იმყოფება ფილტვის ხელოვნურ ვენტილაციაზე და სამივესთან არის ტრამვოჰემორაგიული შოკი.

რატიანის თქმით, ამ ეტაპამდე პაციენტები დამატებით ქირურგიულ ჩარევას არ საჭიროებენ, თუმცა განხორციელდა ყველა საჭირო ინტერვენცია.

შატილის გზაზე ავტოსაგზაო შემთხვევას 17 ადამიანი ემსხვერპლა, 3 კი მძიმედ დაშავდა. უწყების ცნობით, მიკროავტობუსი გადავარდა კლდოვან ფერდობზე, დაახლოებით 80 მეტრის სიმაღლიდან. 3 დაზარალებული პაციენტი ამ დრომდე საუნივერსიტეტო კლინიკაში იმყოფებიან.