ჰომოფობიური და ძალადობრივი ჯგუფების ლიდერმა, გურამ ფალავანდიშვილმა ქობულეთში სქესობრივ განათლებაზე გრაფიტი დააზიანა. ვიდეოში ფალავანდიშვილი ამბობს, რომ მერი, რომელმაც ამის დაწერა დაუშვა "საცემია" და ის უნდა გადადგეს.

"სექსუალური განათლება არ არის მხოლოდ სქესობრივ ურთიერთობებთან დაკავშირებული. ეს არის კომპლექსი, რომელშიც შედის ღირებულებები, უფლებები, სამედიცინო საკითხები, უსაფრთხოება, ემოციები", — ეს ტექსტი ფალავანდიშვილის მტკიცებით, საზიანოა ბავშვებისთვის, ამიტომ ის შავი სპრეით გადაღება.

ვიდეოს ჩაწერის პარალელურად ფალავანდიშვილი საუბრობდა, რომ დაჯარიმების არ ეშინია:

"მე წავშალე და მე დამაჯარიმეთ. მაგათ დავაჯარიმებთ ჩვენ, თავიანთ კაბინეტებში დავაჯარიმებთ. ეგ უნდა იჯდეს ციხეში... ქალაქის მერიამ დამირეკოს მე, გურამ ფალავანდიშვილი ვარ მე და ამ სიბინძურეს ვშლი".

ვიდეოში ფალავანდიშვილი მიმართავს ქობულეთის მერსაც და აცხადებს: "კაცი საცემი ხარ, კაი საცემი ხარ, მინიმუმ".

ქალთა ფონდისა და GrlzWave-ის საერთო პროექტის, შეიმეცნეს ფარგლებში სექსუალურ განათლების შესახებ ცნობიერების ასამაღლებლად მსგავსი გრაფიტი საქართველოს რამდენიმე ქალაქში დაიხატა. როგორც GrlzWave-ის თანადამფუძნებელი ათინა ბრეგვაძე On.ge-სთან საუბარში განმარტავს, მათ გააკეთეს გრაფიტები ქალთა სქესობრივ-რეპროდუქციულ ჯანმრთელობაზე და ამისთვის ოფიციალური ნებართვაც აქვთ აღებული.

მისივე თქმით, გრაფიტი ქობულეთში სანაპირო ზოლთანაა დახატული და არა სკოლასთან, როგორც ამას ფალავანდიშვილი ამტკიცებს.

გრაფიტი გადაღებვამდე

გრაფიტი გადაღებვამდე

ფოტო: ქალთა ფონდი / GirlzWave

გურამ ფალავანდიშვილი და მისი მხარდამჭერები ხშირად მონაწილეობენ და თავად აორგანიზებენ ძალადობრივ აქციებს, სადაც ჰომოფობიურ, ქსენოფობიურ მოწოდებებს აჟღერებენ. მას აქვს შექმნილი ე.წ. ბავშვთა უფლებების დაცვის ორგანიზაცია, რომელიც სკოლაში რელიგიის გაკვეთილების დაბრუნებას და სექსუალურ განათლებაზე საუბრის აკრძალვას მოითხოვს.