ოკუპირებული აფხაზეთში მოქმედი ომის ვეტერანთა ორგანიზაცია აცხადებს, რომ 18 აგვისტოს ოკუპირებულ აფხაზეთში პატრიოტთა ალიანსის წევრებს აფხაზეთის დე ფაქტო პრეზიდენტის წარმომადგენელი, ლაშა საყანია შეხვდა. ეხო კავკაზას ინფორმაციით, აღნიშნულთან დაკავშირებით, ისინი განმარტებას მოითხოვენ.

"ჩვენ ხელისუფლებისგან ოფიციალურ ინფორმაციას ველოდებით. თუკი უახლოეს პერიოდში მათგან არ იქნება განმარტება, პარლამენტის დეპუტატებს ვთხოვთ, მიმართონ შესაბამის სტრუქტურებს, რათა ასეთი შეხვედრის მიზეზები და დაადგინონ და გამართონ მოსმენები შესაბამის კომიტეტში", — აცხადებენ ორგანიზაციაში.

პატრიოტთა ალიანსის ლიდერების, ირმა ინაშვილისა და დავით-თარხან მოურავის სოხუმში ყოფნის შესახებ ინფორმაცია მთავარმა არხმა გუშინ, 20 აგვისტოს გაავრცელა. ტელეკომპანიას ვიზიტის შესახებ ინფორმაცია სასწრაფო-სამედიცინო დახმარების ექიმებმაც დაუდასტურეს, რომელთა თქმითაც, პარტიის ლიდერები საკარანტინე ზონაში არიან გადაყვანილები.

გუშინ პარტიაში On.ge-ს განუცხადეს, რომ მომხდართან დაკავშირებით კომენტარს არ აკეთებენ, გავრცელებულ ინფორმაციას კი "არც უარყოფენ და არც ადასტურებენ". დღეს გავრცელებული ინფორმაციის გადასამოწმებლად On.ge ირმა ინაშვილს პირად მობილურზე დაუკავშირდა, ყურმილი მისმა თანაშემწემ აიღო და გვითხრა, რომ საკითხზე კომენტარს, ჯერჯერობით, არ აკეთებენ.

აფხაზეთის რეგიონი 27 თებერვლიდან, მას შემდეგ ჩაიკეტა, რაც საქართველოში 26 თებერვალს კორონავირუსის პირველი შემთხვევა დაფიქსირდა.