საქართველოს შინაგან საქმეთა ყოფილი მინისტრი, ვანო მერაბიშვილი საკუთარ ფეისბუქგვერდზე ერთიანი ნაციონალური მოძრაობის მაჟორიტარი დეპუტატობის კანდიდატებს ასახელებს ოთხ მაჟორიტარულ ოლქში;

  • ახალციხის, ადიგენის, ასპინძისა და ბორჯომის ოლქში — ვაჟა ჩიტაშვილი;
  • საჩხერის, ჭიათურისა და ხარაგაულის ოლქში — გიორგი კაპანაძე;
  • წყალტუბოს, სამტრედიის, ვანისა და ხონის ოლქში — დევი ჭანკოტაძე;
  • გორსა და კასპში — ბადრი ბასიშვილი;

On.ge დაუკავშირდა ერთიანი ნაციონალური მოძრაობის პრესსამსახურს, რათა აღნიშნული ინფორმაციის სანდოობა დაედასტურებინა, თუმცა ისინი დანამდვილებით ვერ გვეუბნებიან არის თუ არა ოფიციალური ვანო მერაბიშვილის მიერ გავრცელებული მაჟორიტარი დეპუტატობის კანდიდატების სია.

On.ge-მ, ასევე, ჰკითხვა ენმ-ის პრესსამსახურს არის თუ არა ვანო მერაბიშვილი ჯერ კიდევ ნაციონალური მოძრაობის წევრი და უკავია თუ არა პარტიაში რაიმე თანამდებობა, რაზეც გვიპასუხეს, რომ ყოფილ შს მინისტრს პარტიაში თანამდებობა არ უკავია, თუმცა დაზუსტებით ვერ იტყვიან არის თუ არა ვანო მერაბიშვილი ჯერ კიდევ პარტიის წევრი, ვინაიდან ენმ-ში ძალიან ბევრი წევრია.