ისრაელის საბრძოლო თვითმფრინავებმა ღაზას სექტორში ჰამასის სადამკვირვებლო პუნქტები დაბომბა. ისრაელის განცხადებით, ეს ქმედება პალესტინელების მიერ საზღვართან დაწყებული შეტევის პასუხი იყო.

ჰამასი, იგივე ისლამური წინააღმდეგობის მოძრაობა — პალესტინის სუნიტური-ისლამისტური ფუნდამენტალური ორგანიზაციაა, რომლის მიზანიც პალესტინის ისრაელის ოკუპაციისგან განთავისუფლებაა.

”რეაქტიულმა გამანადგურებელმა და [სხვა] თვითმფრინავებმა ღაზას კუთვნილ ტერიტორიაზე ჰამასის კუთვნილებაში მყოფი ინფრასტრუქტურა დაბომბეს", — წერს aljazeera ისრაელის სამხედრო განცხადებაზე დაყრდნობით.

დაძაბულობა ერთ კვირაზე მეტია იზრდება. ისრაელი ჰამასს შეტევის დაწყებაში ადანაშაულებს და ამბობს, რომ ისინი საზღვრის გასწვრივ სხვადასხვა ასაფეთქებელ მოწყობილობებს იყენებდნენ.

ისრაელმა შემოიღო აკრძალვა ღაზას სანაპიროზე თევზაობის თაობაზე და შვიდი ღამის განმავლობაში ატარებდა ღამის საჰაერო იერიშებს.

ჰამასის ინფორმაციით, თავდასხმას მსხვერპლი არ მოჰყოლია. მისივე თქმით, ისრაელის ოკუპაციური რეჟიმი აგრძელებს პალესტინაზე აგრესიას და საჰაერო დარტყმებიც ღაზაზე მოულოდნელი არ ყოფილა.