ევროპული საქართველოს ერთ-ერთი ლიდერი და ქუთაისის მაჟორიტარობის კანდიდატი, ოთო კახიძე ამბობს, რომ მომავალი პრემიერმინისტრი კოალიციური ხელისუფლების მხრიდან კომპრომისული ფიგურა იქნება.

"ევროპული საქართველო კონცენტრირებულია ივანიშვილის დამარცხების ამოცანაზე. ეს არის ჩვენთვის მთავარი და არა ვინმეს გაპრემიერებაზე საუბარი. მომავალი პრემიერმინისტრი, მას შემდეგ, რაც ივანიშვილის დავამარცხებთ, იქნება კოალიციური ხელისუფლების მხრიდან კომპრომისული ფიგურა, რომელიც მისაღები იქნება არა ერთი რომელიმე პოლიტიკური ძალისთვის, არამედ მრავალფეროვანი კოალიციისთვის. ამაზე საუბარი ამ მომენტისთვის ნაადრევია, ჩვენ უნდა ვიყოთ ფოკუსირებული ივანიშვილის დამარცხებაზე", — ამბობს კახიძე.

ევროპული საქართველოს ერთ-ერთმა ლიდერმა, დავით ბაქრაძემ ღამის კურიერში თქვა, რომ კოალიციური მთავრობის შემთხვევაში, მიხეილ სააკაშვილი, ზურაბ ადეიშვილი და ვანო მერაბიშვილი მინისტრთა კაბინეტში არ იქნებიან, მათ შორის, არც პრემიერმინისტრად. ბაქრაძეს ამ ინტერვიუში ზოგადად ნაციონალურ მოძრაობასთან კოალიციაზე არ უსაუბრია. მიუხედავად ამისა, დღეს ენმ-ს ერთ-ერთი ლიდერი, ხატია დეკანოიძე მას ასე გამოეხმაურა:

"თუ ნაციონალურ მოძრაობას, რომელიც არის ყველაზე დიდი ოპოზიციური პარტია, არ უქმნი კოალიაციას, მაშინ ლოგიკურად არის მეორე, ქართული ოცნება, ბიძინა ივანიშვილი".

პარტიის კიდევ ერთმა ლიდერმა, სალომე სამადაშვილმა კი თქვა, რომ დავით ბაქრაძის მხრიდან მიხეილ სააკაშვილზე თავდასხმა ევროპული საქართველოს მაჟორიტარ კანდიდატებს ძვირი დაუჯდებათ.