დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს გარემოს დაცვის და სოფლის მეურნეობის მინისტრის, ლევან დავითაშვილის, განცხადებით, მესტიაში საკარანტინო ზონებში მოქცეული მოსახლეობისს პროდუქტებით მომარაგებას არანაირი საფრთხე არ ემუქრება.

"მოსახლეობის სურსათით და სხვა პირველადი დანიშნულების პროდუქტებით მომარაგებას არანაირი საფრთხე არ ემუქრება, რეგიონში არ შეინიშნება არანაირი პროდუქტის დეფიციტი. ამ დილის მონაცემებით, დაძრულია რამდენიმე დისტრუბუციის სატვირთო მანქანა ქუთაისიდან და სტანდარტული დისტრიბუცია მუშაობს შეუჩერებლად. ისინი რეგიონში შედიან უპრობლემოდ", — აცხადებს ის.

მისივე თქმით, სამინისტრო პასუხისმგებელია საკარანტინო შეზღუდვების პირობებში მომარაგების საკითხებზე და იმ შემთხვევაში, როდესაც წესდება გარკვეული შეზღუდვები გადაადგილებაზე, უწყება მობილიზებულია, რომ მოსახლეობას სურსათის, პირველადი დახმარების და სხვა პროდუქტებით მომარაგების პრობლემები არ შეექმნათ.

მინისტრი აღნიშნავს, რომ უკვე ჰქონდათ გარკვეული გამოცდილება ქვემო ქართლის საკარანტინო სივრცეებში მუშაობისას, თუმცა დიდი ტერიტორიის და დაბალი სიმჭიდროვის გათვალისწინებით, სვანეთს გარკვეული სპეციფიკა გააჩნია. ამასთან, დავითაშვილი ამბობს, რომ ბევრი სოფელი მოშორებულია რაიონული ცენტრიდან, თუმცა მიმდინარეობს მაღალი დონის კოორდინაცია შესაბამის უწყებებს შორის.

"ჩვენ გვესმის, რომ ქვემო ქართლში სასოფლო-სამეურნეო მიმართულებით ძალიან დიდი აქტივობა იყო, სვანეთში არ არის ასეთი აქტივობა. ძირითადად, სვანეთის რეგიონში სურსათის შეტანა გარედან ხდება", — აღნიშნა მან.

მინისტრმა ისაუბრა იმაზეც, რომ ახლა სვანეთში მერქნული რესურსის დამზადების სეზონია და მოხდა ამ პროცესის ორგანიზებაც.

"აქაც არის გამოყოფილი სპეციალური ჯგუფი, რომელიც აღრიცხავს თითოეულ ავტოსატრანსპორტო საშუალებას, რომელიც შედის რეგიონში, ახდენს მერქნული რესურსის დატვირთვას და რეგიონიდან უპრობლემოდ გამოტანას. ასევე, ყველა ის ოპერატორი, რომელიც არის კონტრაქტორი ეროვნული სატყეო სააგენტოს, აგრძელებს მუშაობს იმისთვის, რომ სეზონი, რომელიც ძალიან მოკლეა, წარიმართოს შეფერხების გარეშე", — განაცხადა დავითაშვილმა.

კორონავირუსის ახალი დადასტურებული შემთხვევების გამო, მესტიაში შესვლა და გამოსვლა შეზღუდულია. თავდაპირველად, Covid-19 ერთი ოჯახის 17 წევრს დაუფიქსირდა, რის შედეგადაც მესტია ჩაკეტეს.

ჯამში, ამ დროისთვის ქვეყანაში კორონავირუსის დადასტურებულ შემთხვევათა რაოდენობა 1 278-მდე გაიზარდა, მათ შორის, გამოჯანმრთელებულია 1058 ადამიანი, გარდაცვლილი — 17. კარანტინის რეჟიმში 7 718 პირი რჩება, სტაციონარში მეთვალყურეობის ქვეშ კი 245 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: