გოგი თოფაძის შვილიშვილის ადვოკატის განცხადებით, ლევან თოფაძე ამბობს, რომ დანა ან მსგავსი საგანი არ დაუნახავს და დაზიანებები ბუსა ჟვანიასთან შეხლა-შემოხლის შედეგად მიიღო. ეს განცხადება ადვოკატმა გუშინ, თოფაძის გამოკითხვის შემდეგ გააკეთა.

ადვოკატის თქმით, თოფაძემ ასევე განმარტა, რომ ბუსა ჟვანიასთან მხოლოდ ნაცნობობა აკავშირებდა, ხოლო მათი დაპირისპირება სატელეფონო საუბრის შემდეგ დაიწყო. გიორგი ანთაძე ასევე აცხადებს, რომ სატელეფონო საუბრის დროს მუქარა არ გაჟღერებულა და თოფაძე და ჟვანია მხოლოდ სიტყვიერად დაუპირისპირდნენ ერთმანეთს.

ჟურნალისტის კითხვას, აღნიშნული ჩვენება გამოიწვევს თუ არა ბუსა ჟვანიასთვის ბრალის შემსუბუქებას, ადვოკატმა უპასუხა, რომ ეს შემდეგ სხვა მტკიცებულებების საფუძველზე გადაწყდება.

"ეს არის რა ჩვენებაც მისცა თავად დაზარალებულმა, თუმცა შეუმსუბუქდება, დაუმძიმდება თუ სხვა, ეს საქმეში არსებული სხვა მტკიცებულებების საფუძველზე უნდა გადაწყვიტოს ბრალდების მხარემ და შემდეგ უკვე სასამართლომ", — აღნიშნა ადვოკატმა.

ადვოკატის განმარტებითვე, ლევან თოფაძემ თავის ჩვენებაში რაიმე საგნით ბუსა ჟვანიასთვის დაზიანებების მიყენება უარყო.

"რა თქმა უნდა, დასმული იყო ეგ შეკითხვა გამომძიებლის მხრიდან და კატეგორიულად უარყო, რომ მას რაიმე სახით ან ნებისმიერი საგნით დაზიანება მიეყენებინა ბუსა ჟვანიასთვის", — განაცხდა გიორგი ანთაძემ.

ბიზნესმენის და ყოფილი დეპუტატის, გოგი თოფაძის შვილიშვილი, 2 აგვისტოს საკუთარ საცხოვრებელ სახლში დაჭრეს. დაჭრის ბრალდებით ექსპრემიერ ზურაბ ჟვანიას შვილი, ბუსა ჟვანია დააკავეს. გამოძიების ინფორმაციით, ბუსა ჟვანიამ ბიზნესმენ გოგი თოფაძის შვილიშვილს, ლევან თოფაძეს მისივე სახლის აივანზე დანით სიცოცხლისთვის საშიში დაზიანებები მიაყენა, მათ შორის შემავალი ჭრილობები გულმკერდის წინა და უკანა ზედაპირზე, ასევე, ნაკვეთი ჭრილობა კისრის გვერდითა ზედაპირზე და ყურის ნიჟარაზე. უწყების განცხადებით, შემთხვევის ადგილიდან სავარაუდო დანაშაულის ჩადენის იარაღი — დანა ამოიღეს. როგორც თოფაძე, ისე ჟვანია საავადმყოფოში გადაიყვანეს. ამ დროისთვის ორივე მათგანი გაწერილია.

ბუსა ჟვანიას ბრალი განზრახ მკვლელობის მცდელობის მუხლით აქვს წარდგენილი, რაც სასჯელის სახედ და ზომად 7 დან 15 წლამდე თავისუფლების აღკვეთას ითვალისწინებს.