ზურაბ ჟვანიას ძმა, გოგლა ჟვანია ადასტურებს, რომ გოგი თოფაძის შვილიშვილის დაჭრის ბრალდებით დაკავებული ბუსა ჟვანიაც დაჭრილია. როგორც გოგლა ჟვანიამ რუსთავი 2-თან თქვა, ბუსა ჟვანია მუცლის არეშია დაჭრილი და ამ დროისთვის მისი ჯანმრთელობის მდგომარეობა დამაკმაყოფილებელია.

"ბუსა ჟვანიას ჯანმრთელობის მდგომარეობა ნორმალურია, ჭრილობა ცივი იარაღით აქვს მიყენებული მუცლის არეში. ოპერაცია არ დასჭირდა", — ამბობს გოგლა ჟვანია.

ბიზნესმენის და ყოფილი დეპუტატის, გოგი თოფაძის შვილიშვილის დაჭრის ბრალდებით ექსპრემიერ ზურაბ ჟვანიას შვილი გუშინ, 2 აგვისტოს დააკავეს.

გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით მიმდინარეობს, რაც ჯანმრთელობის განზრახ მძიმე დაზიანებას გულისხმობს. დანაშაული 3-დან 6 წლამდე ვადით თავისუფლების აღკვეთას ითვალისწინებს.