თბილისის მერისა და ქართული ოცნების გენერალური მდივნის, კახა კალაძის თქმით, მათი საარჩევნო კამპანია მომავალზე, სამომავლო ხედვებსა და გეგმებზე იქნება ორიენტირებული. ასე უპასუხა მან ჟურნალისტების კითხვას — გამომდინარე იქედან, რომ ირაკლი ღარიბაშვილმა სიტყვით გამოსვლისას დიდი დრო ყოფილ ხელისუფლებას დაუთმო, აგებს თუ არა მმართველი პარტია 2020 წლის არჩევნებსაც ნაციონალური მოძრაობის კრიტიკაზე.

"ჩვენი საარჩევნო კამპანია იქნება ორიენტირებული მომავალზე, სამომავლო ხედვებზე, გეგმებზე, თუ როგორ წარმოგვიდგენია ქვეყნის განვითარება, რას ვპირდებით და რას ვეუბნებით მოსახლეობას, თუ როგორ მოხდება ქვეყნის განვითარება.

ჩვენ ხომ ყველაფერზე შედარებები უნდა გავაკეთოთ, რა იყო წარსულში, როგორ გვაქვს დღეს და საით მივდივართ, როგორი ქვეყანა გვინდა განვავითაროთ და როგორი ქვეყანა წარმოგვიდგენია ჩვენი საქართველო. შესაბამისად, მთავარი მიმართულება იქნება მომავალზე ორიენტირებული და სამომავლო ხედვები, რომელზეც ვესაუბრებით ჩვენი ქვეყნის მოსახლეობას", — განაცხადა მერმა.

კახეთში მაჟორიტარი დეპუტატის წარდგენისას თავდაცვის მინისტრმა, ირაკლი ღარიბაშვილმა კვლავ ახსენა წინა ხელისფულება და ისინი ომის ვერაცილებაში დაადანაშაულა. მისივე თქმით, ამის გამო ნაციონალურ მოძრაობას პოლიტიკაში ყოფნის უფლება არ აქვს.