ევროპული საქართველოს ერთ-ერთი ლიდერი, გიგა ბოკერია ექს-პრეზიდენტის განცხადებას გიორგი ვაშაძეზე "პუტინისტური რუსეთისა და ბიძინა ივანიშვილის კლიმატს" უწოდებს. ამის შესახებ მან პალიტრა ნიუსის ეთერში ისაუბრა.

"მიხეილ სააკაშვილის ეს განცხადება ცუდი განცხადებაა არა იმიტომ, რომ მე ვაშაძის ადვოკატი ვარ, ისიც ჩვენი კონკურენტია როგორც პარტია, მაგრამ თავისთავად, ამ ტიპის თამაშის ის წესები, რომ გუშინ ერთად ვიყავით, მაგრამ თუ რაღაცაზე ვერ ვთანხმდებით, მერე უცებ მოღალატე ხდები, ეს არის პუტინისტური რუსეთის კლიმატი და ბიძინა ივანიშვილის. ეს არანორმალურია", — აღნიშნა ბოკერიამ.

2 აგვისტოს მიხეილ სააკაშვილმა გიორგი ვაშაძის მიერ ძალა ერთობაშიას დატოვებას "ბნელ მხარეზე გადასვლა უწოდა.

"ყოველთვის მომწონდა გიორგი ვაშაძე, როგორც ბევრი სხვა ადამიანი. ყოველთვის იმედებს ვამყარებდი და შანსს ვაძლევდი. ზოგი ამართლებს ამ შანსს და ზოგი არ ამართლებს. ხელით მთელი ცხოვრება ვერავის ვერ ვათრევ. სანამ რაღაც ჯგუფში მუშაობდა, თავისი საარჩევნო ფუნქცია ჰქონდა და ამ ფუნქციას ასრულებდა ნამდვილად. ფაქტია, რომ ვაშაძე გადავიდა ბნელ მხარეს", — განაცხადა სააკაშვილმა.

ყოფილი თანაგუნდელის შეფასებას გამოეხმაურა გიორგი ვაშაძეც. მან სააკაშვილს Star Wars-ის პერსონაჟით უპასუხა.

"ჩვენ ვართ ის ძალა, ვინც გაიმარჯვებს ბნელ მხარეზე!", — დაწერა მან ფეისბუქზე.

27 ივლისს, გიორგი ვაშაძემ და თაკო ჩარკვიანმა პოლიტიკურ პარტიათა კოალიცია, ძალა ერთობაშია დატოვეს და ახალი პოლიტიკური პლატფორმა, სტრატეგია აღმაშენებელი წარადგინეს. მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.