ყოფილი დეპუტატი, კობა დავითაშვილი სოციალურ ქსელში თავისი დაავადების შესახებ საუბრობს და მთავრობას დახმარებას სთხოვს.

მან აღნიშნა, რომ დაავადებიდან გამომდინარე 2 თვეში ერთხელ აუცილებლად ესაჭიროება მედიკამენტი, რომელიც 1000 დოლარი ღირს და მის შესაძენად თანხა არ აქვს.

"ცუდად ვიყავი და ექიმთან ვერ წავედი უსახსრობის გამო. მაგრამ წინ უფრო ცუდი დღეები მელის. საქმე ისაა რომ ჩემი (ბეხტერევის) დაავადება არ იკურნება და შეიძლება მხოლოდ გადავადდეს აღსასრული პრეპარატ "რემიკეიდის" ორ თვეში ერთხელ გადასხმით, როგორც ინსულინის ინექცია კი ვერ კურნავს, მაგრამ ავადებს დიაბეტის შედეგების დადგომას. ოღონდ ინსულინისაგან განსხვავებით, რემიკეიდის სახელმწიფო პროგრამა არ არსებობს და მისი 1 გადასხმა 1000 აშშ დოლარი ჯდება. ანუ თუ არ მექნა თვეში 500 დოლარის შემოსავალი მაინც, ტანჯვით სიკვდილისთვის ვარ განწირული. მე კი მარტში სრულიად უმუშევარი დავრჩი. ერთი გადასხმის ფული მერიამ ჩამირიცხა, მესამედი ვეტერანთა დეპარტამენტმა (დიდი მადლობა მათ) ჯანდაცვის სამინისტრომ ვერაფერი ჩამირიცხა არცაა გასაკვირი, კორონავირუსთან დაკავშირებით ისედაც ბევრი ხარჯი აქვს. მე მესმის, რომ ყველას უჭირს და დალხინებული არავინაა, მაგრამ თუკი ამ დღეში თავად სახელმწიფომ ჩამაგდო (წინა ხელისუფლების სახით) განა სამართლიანი არ იქნება რომ ჯანდაცვის ხარჯებიც სახელმწიფომ გაიღოს (ამ ხელისუფლების სახით)", — წერს კობა დავითაშვილი.

კობა დავითაშვილი საქართველოს ოთხი მოწვევის პარლამენტის წევრია. ბოლოს ის დეპუტატად ქართული ოცნების პარტიული სიით აირჩიეს, 2012-2016 წლის მოწვევის პარლამენტში. დავითაშვილი ამჟამად პარლამენტის წევრი არ არის.