ვებგვერდზე ტექნიკური პრობლემის გამო გირჩი პროპორციულ პარტიულ სიას თავიდან გამოავლენს. როგორც პარტიაში აცხადებენ, საიტზე შემოსულთა რიცხვმა და ტრანზაქციების რაოდენობამ მოლოდინს რამდენჯერმე გადააჭარბა და სერვერს პრობლემა შეექმნა.

"ამან გამოიწვია ის, რომ ტრანზაქციებისა და მხარდაჭერების რაღაც რაოდენობა არ აისახა დროულად საბოლოო რეიტინგზე, საბოლოო სიაზე. შედეგად, მივიღეთ რეალურისგან ოდნავ განსხვავებული სია", — აღნიშნავენ გირჩში.

დღეს, 30 ივლისს 16:20 საათზე გირჩის მხარდამჭერებს GeD-ის, პარტიის კრიპტოვალუტის საშუალებით სია უნდა გამოევლინათ. ხმის მიცემის დასრულების შემდეგ ვებგვერდზე ინფორმაცია არ განახლებულა და თითქმის ორმოცი წუთის განმავლობაში საბოლოო სიის ფორმირებას ელოდნენ. ამის შემდეგ კი პარტიის ლიდერმა, ზურაბ ჯაფარიძემ განაცხადა, რომ 17:00 საათის მონაცემებით არსებული სია საბოლოოდ ვარიანტს წარმოადგენდა.

გირჩში განმარტავენ, რომ სია მხოლოდ დათქმული დროიდან 2 საათში გასწორდა.

მათივე თქმით, კითხვის ნიშნების თავის ასარიდებლად მათ პროცესის თავიდან ჩატარება გადაწყვიტეს. დღესვე, საღამოს 19:00-ზე საიტზე ისევ ჩაირთვება ხმის მიცემის პროცესი და GeD-ების ყველა მფლობელს თავიდან შეეძლება ხმა მისცეს სასურველ კანდიდატს. ხოლო ხვალ, 31 ივლისს, 17:00-ზე ხმის მიცემის პროცესი ჩაიკეტება. ამის შემდეგ საიტს მიეცემა მინიმუმ 1 საათი კალკულაციისთვის და საბოლოო სიის გამოვლენისთვის.

დღევანდელი, თავდაპირველი ვარიანტით, სიის პირველ ათეულში ადგილები ასე გადანაწილდა:

პარტიის სიაში ადგილები ასე გადანაწილდა:

  • ზურაბ გირჩი ჯაფარიძე;
  • ჰერმან საბო;
  • იაგო ხვიჩია;
  • ვახტანგ მეგრელიშვილი;
  • გია ჯაფარიძე;
  • ალექსანდრე რაქვიაშვილი;
  • ლევან ჯგერენაია;
  • ალექსანდრე თარხან-მოურავი;
  • ამირან ტორონჯაძე;
  • გიორგი ლომინაძე.

როგორც გირჩში განმარტავენ, მათ მხარდამჭერებს პარტიისთვის გაწეული კონტრიბუციის სანაცვლოდ ეძლეოდათ GeD, გირჩის კრიპტოვალუტა. სასურველი კანდიდატისთვის კრიპტოვალუტის გადარიცხვით კი მხარდამჭერი ავლენდა, ვისი ნახვა სურდა გირჩის საარჩევნო სიაში.