"უკიდურესად შემაშფოთებელია ის ფაქტი, რომ საკონსტიტუციო სასამართლომ არ გაითვალისწინა ჩვენი სასარჩელო მოთხოვნა", — ასე ეხმიანება სახალხო დამცველი ნინო ლომჯარია საკონსტიტუციო სასამართლოს გადაწყვეტილებას, რომლის მიხედვითაც სარჩელი უზენაესი სასამართლოს მოსამართლეების არჩევის წესზე არ დაკმაყოფილდა.
მისი განცხადებით, შემაშფოთებელია, რომ სასამართლომ არ გააუქმა ის ნორმა, რომელიც "კონსტიტუციის მოთხოვნების საწინააღმდეგოდ, არაკომპეტენტური და არაკეთილსინდისიერი" მოსამართლეების წარდგენის შესაძლებლობას იძლევა.

ომბუდსმენის განმარტებით, საკონსტიტუციო სასამართლოს გადაწყვეტილების შეფასებისას, განსაკუთრებულ ყურადღებას იმსახურებს ფაქტი, რომ გადამწყვეტი ამ საქმეში მოსამართლე ხვიჩა კიკილაშვილის ხმა იყო.

“[ხვიჩა კიკილაშვილი] საგანგებო მდგომარეობის დროს, გაუმჭვირვალე პროცედურით სწორედ იმ მოსამართლეთა მიერ შეირჩა, რომლებიც სადავო ნორმების საფუძველზე გამწესდნენ უზენაეს სასამართლოში. ეს ფაქტორი განსაკუთრებით იმსახურებს ხაზგასმას საკონსტიტუციო სასამართლოს გადაწყვეტილების შეფასებისას და აჩენს ეჭვებს გადაწყვეტილების მიღების მოტივაციასთან დაკავშირებით", — წერს ლომჯარია ფეისბუქგვერდზე.

საკონსტიტუციო სასამართლომ უზენაესი სასამართლოს მოსამართლის თანამდებობაზე პარლამენტისთვის წარსადგენი კანდიდატების შერჩევის წესზე ომბუდსმენის სარჩელი არ დააკმაყოფილა. გადაწყვეტილება პლენუმმა დღეს, 30 ივლისს მიიღო.

სარჩელში სახალხო დამცველი მიუთითებდა, რომ საქართველოს უზენაესი სასამართლოს მოსამართლეობის კანდიდატთა შერჩევის სისტემა ვერ უზრუნველყოფს შერჩევის სამართლიანი პროცედურებით განხორციელებას, რადგან წარსადგენი კანდიდატები შეირჩევა ფარული კენჭისყრით, ეს კი ართულებს მიღებული გადაწყვეტილების გასაჩივრების შესაძლებლობას. სასამართლომ მოსარჩელის არგუმენტები არ გაიზიარა და მოსამართლეთა შერჩევის წესი უცვლელი დატოვა.