NDI-ის ბოლო კვლევით, 76 პროცენტი ამბობს, რომ მათთვის მისაღებია გაცხადებული მიზანი, საქართველო გახდეს ევროკავშირის წევრი. 2019 წლის ნოემბერში გამოქვეყნებული NDI-ის კვლევით, ევროკავშირის მხარდაჭერის მაჩვენებელი 82 პროცენტი იყო.

კვლევისას გამოკითხულთა უმრავლესობის, 56 პროცენტის აზრით, ევროატლანტიკური ინტეგრაცია მეტ სარგებელს მოუტანს საქართველოს. ხოლო, მხოლოდ 11 პროცენტი ფიქრობს, რომ საქართველო რუსეთთან უკეთესი ურთიერთობით მიიღებს მეტ სარგებელს.

ფოტო: NDI

ინსტიტუტმა გამოიკვლია ჩრდილოატლანტიკური ალიანსის მიმართ განწყობებიც. კვლევით დადგინდა, რომ მოსახლეობის 69 პროცენტი უჭერს მხარს ნატოში გაწვრიანებას, ხოლო 11%-სთვის ეს მიუღებელია.

NDI-მ კვლევისთვის სატელეფონო გამოკითხვა და ფოკუს ჯგუფების მეთოდოლოგია გამოიყენა. სატელეფონო გამოკითხვის შემთხვევაში, საველე სამუშაოები 26-30 ივნისს ჩატარდა და შედგა 1 550 დასრულებული ინტერვიუ. ორგანიზაციის ინფორმაციით, რესპონდენტები შემთხვევით ნომერზე დარეკვის მეთოდით შეირჩა და ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით). გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის. საშუალო ცდომილების ზღვარი +/- 2%-ია, თუმცა იცვლება სხვადასხვა კითხვის მიხედვით.

რაც შეეხება ფოკუს ჯგუფებს, საველე სამუშაოები 24-30 ივნისს, ხუთ ქალაქში ჩატარდა: თბილისი, ზუგდიდი, ბათუმი, მარნეული, ახალქალაქი. თითოეულ ქალაქში 2 ფოკუს ჯგუფი იყო: შერეული ასაკი, სქესი და დასაქმების სტატუსი. მონაწილეები შეარჩიეს ორი მეთოდით: CRRC-ის კოორდინატორები მიდიან ქალაქის რამდენიმე ცენტრალურ ადგილას, შემთხვევითად აჩერებენ ადამიანებს და ჯგუფურ დისკუსიაში მონაწილეობას სთავაზობენ და "თოვლის გუნდის" მეთოდი. ფოკუს ჯგუფში დისკუსიას პროფესიონალი მოდერატორი უძღვებოდა, ღია კითხვებით.