ისრაელში, იერუსალიმის ცენტრალურ ტერიტორიაზე მიმდინარე ანტისამთავრობო აქცია პოლიციამ წყლის ჭავლით დაშალა. საპროტესტო მსვლელობების დროს 55 მომიტინგე დააკავეს. ამის შესახებ The Guardian წერს.

მონაწილეები ქვეყნის პრემიერმინისტრის, ბენიამინ ნეთანიაჰუს გადადგომის მოთხოვნით ხუთშაბათს გამოვიდნენ. დემონსტრანტების განცხადებით, ნეთანიაჰუ შექმნილ ეპიდსიტუაციას ეფექტურად ვერ უმკლავდება. პარალელურად, საპროტესტო გამოსვლები პრემიერის მხარდამჭერებმაც გამართეს.

ფოტო: Ammar Awad/Reuters

ქვეყანაში ანტისამთავრობო აქციები ბოლო რამდენიმე თვეა მიმდინარეობს. პრემიერმინისტრის მოწინააღმდეგეები ისრაელის მთავრობის ხელმძღვანელის რეზიდენციასთანაც იყვნენ შეკრებილი. მათი გამოსვლები მას შემდეგ დაიწყო, რაც მაისში ბენიამინ ნეთანიაჰუს სასამართლო პროცესი დაინიშნა. პრემიერმინისტრს ბრალი კორუფციაში ედება.

აქციებმა მასშტაბურობა მას შემდეგ შეიძინა, რაც ქვეყანაში კორონავირუსით ინფიცირებულთა მეორე ტალღა წამოვიდა და ქვეყანა ეკონომიკური კრიზისის პირისპირ აღმოჩნდა. ამას დაემატა, ოთხშაბათს მიღებული ახალი კანონპროექტი, რის მიხედვითაც ქვეყნის მთავრობას კორონავირუსთან საბრძოლველად უფლებამოსილება გაეზარდა.

ისრაელში 24 ივლისის მონაცემებით კორონავირუსის 58 559 შემთხვევაა დაფიქსირებული, აქედან 446 ადამიანი გარდაცვლილი, 25 587 — გამოჯანმრთელებულია.